Москва тврди: Западот подготвува провокација против американски брод, вината ќе ѝ ја припише на Русија

Руската Служба за надворешно разузнавање (СВР) обвини дека Украина и Велика Британија наводно подготвуваат серија провокации во Балтичкото Море, со цел да го нарушат тековниот дипломатски процес меѓу Русија и САД.

Според објавата на СВР, постојат информации за можен „инсцениран“ напад врз американски воен брод, кој би бил претставен како дело на Русија. Наводно, советски и руски торпеда веќе биле префрлени од Украина до британски партнери, со цел да се создаде убедлив доказ.

„Планирано е дел од торпедата да експлодираат на безбедно растојание од американскиот брод, додека едно од нив ќе остане неексплодирано и ќе биде претставено како доказ за руска агресија“, се наведува во соопштението на СВР.

Руското разузнавање дополнително тврди дека украинските безбедносни сили се веќе ангажирани и подготвени да ја спроведат оваа операција.

Како алтернативен план, според истите извори, западните сојузници разгледуваат сценарио во кое, со помош на земји од Северна Европа, ќе бидат „случајно“ извлечени стари руски сидрови мини од дното на Балтичкото Море. Тие мини би биле претставени како новооткриена закана за меѓународната поморска безбедност.

Обвинувањата доаѓаат во чувствителен геополитички момент, кога односите меѓу Русија и Западот се на еден од најниските нивоа во последните децении. Засега, нема официјален одговор од украинската или британската страна на овие тврдења.

Share on Facebook

Tweet

Follow us

Save