Од Скопје и Охрид до нови европски центри: ВМРО-ДПМНЕ се пофали со 28 дестинации

Пратеничката на ВМРО-ДПМНЕ, Лидија Петкоска, изјави дека од преземањето на власта досега се воведени 28 нови авиодестинации од македонските аеродроми, оценувајќи дека подобрата воздушна поврзаност е важна за граѓаните, туризмот, бизнисот и инвестициите.

Според неа, од Скопје сега може директно да се патува до Париз, Барселона, Лион, Амстердам, Љубљана, Дубаи, Мадрид, Стокхолм, Келн, Бари, Прага, Ларнака, Неапол, Будимпешта, Алгеро во Сардинија и Палермо во Сицилија.

Од аеродромот во Охрид, пак, како нови дестинации ги наведе Истанбул, Базел, Ларнака, Мадрид, Штутгарт, Бари, Стокхолм, Катовице, Вроцлав, Милано, Братислава и Виена.

„Воздушната поврзаност е важна за секоја модерна и развиена држава. Таа значи полесно патување за граѓаните, повеќе можности за туризмот и бизнисот и поголема отвореност на Македонија кон Европа и светот“, рече Петкоска.

Таа оцени дека новите линии им овозможуваат на граѓаните полесно да патуваат за работа, образование и туризам, како и полесно да ги посетуваат семејствата и пријателите во странство.

Според Петкоска, поголемата воздушна поврзаност е особено значајна и за Охрид, бидејќи овозможува полесно привлекување туристи од нови пазари.

Од ВМРО-ДПМНЕ сметаат дека директните авиолинии имаат значење и за бизнисот, затоа што ја зголемуваат достапноста на државата за инвеститори, компании и меѓународни партнери.

Петкоска најави дека Владата ќе продолжи да работи на проширување на мрежата на авиодестинации од Скопје и Охрид.

Share on Facebook

Tweet

Follow us

Save