Пендаровски: Кризата е можност да ја зајкнеме енергетската инфраструктура

„Кризата е и можност за зајакнување на нашата енергетска архитектура преку вложување во долгорочната енергетска безбедност, достапност и одржливост”, порача денеска претседателот Пендаровски на свеченото отворање на Деновите на групацијата ЕВН, пренесоа од неговиот кабинет.

Говорејќи за кризата со достапноста до енергија, еколошката одржливост и енергетската безбедност, претседателот Пендаровски оценил дека како мала и отворена економија со висока енергетска зависност, Македонија е ранлива на овие процеси. Според Пендаровски, македонскиот енергетски систем не генерира доволно електрична енергија за своите потреби, а како причини ги навел долгогодишното ниско ниво на вложување во енергетските капацитети, незапирливиот раст на побарувачката за електрична енергија во дигиталната ера и неодрживите енергетски навики кај дел од граѓаните.

Од Кабинетот на претседателот информираат дека тој ги пренел главните точки од планот на Владата за справување со кризата – ургентен увоз на неопходните ресурси, зголемување на домашното производство и намалување на потрошувачката.

„Единствениот начин да се излезе на крај со овие предизвици е доколку сме сите заедно, а соработката со ЕВН Македонија е важна како никогаш досега. ЕВН Македонија е клучна алка во македонскиот енергетски систем и е еден од најголемите инвеститори, работодавачи и даночни обврзници во Македонија“, рекол Пендаровски на корпоративниот собир.

Во обраќањето, претседателот ја истакнал и поддршката што компанијата ја дава за реализација на повеќе проекти, како што се програмата „Млади менаџери и бизнис лидери” и добротворната акција „Волонтираме за солидарно општество”, како и поддршката во изготвувањето на „МКД 2030″ како стратешка рамка за развој на Македонија до крајот на оваа деценија, соопшти неговиот кабинет.

Share on Facebook

Tweet

Follow us

Save