Полициска акција во Куманово, неофицијално се истражува група за изнуда и лихварство

Засилено полициско присуство е забележано утрово на улиците во Куманово. Според неофицијални информации, полициски специјалци учествуваат во акција на повеќе локации во рамки на истрага за група осомничена за изнуда, лихварство и перење пари.

Според истите информации, истражителите проверуваат сомнежи дека групата подолг период дејствувала во Куманово и пошироко и користела насилство, закани и уцени за да дојде до пари.

Покрај локациите поврзани со лицата опфатени со акцијата, истражителите, неофицијално, проверуваат и дали нотарска канцеларија и менувачница имаат каква било врска со активностите што се предмет на истрагата.

При досегашните претреси, според неофицијалните информации, биле пронајдени пари, возила и документација. Засега нема официјална потврда дали нешто од пронајденото е одземено и дали има приведени.

Според првичните информации, акцијата следува по подолготрајна оперативна работа на полициските истражители, во координација со Обвинителството за гонење на организиран криминал и корупција.

Share on Facebook

Tweet

Follow us

Save