Прекини во комуникациите ги погодија полицијата, аеродромите и болниците

Голем глобален дефект во системите на „Мајкрософт“ предизвика сериозни проблеми во работата на болници, полициски служби, судови, државни институции и приватни компании низ светот.

Според објавените информации, прекинот трае повеќе од 18 часа, а милиони корисници се соочуваат со потешкотии при користењето на електронската пошта и деловните апликации.

Проблемите започнале во четвртокот, на 12 ноември, а најмногу пријави имало за Outlook, Teams и други услуги од пакетот Microsoft 365.

Според податоците на платформата Downdetector, само во САД биле регистрирани речиси 130.000 пријави за проблеми со Outlook во најкритичниот момент.

Особено сериозни последици се пријавени во Велика Британија, каде што одредени полициски служби не можеле да примаат кривични пријави преку интернет.

Британската Национална здравствена служба (NHS) пријавила потешкотии со електронската пошта и деловната комуникација, додека во Манчестер поради техничките проблеми било прекинато едно судско рочиште.

Дефектот погодил и институции во Австралија, Јапонија, Сингапур, Филипините и Норвешка.

Проблеми пријавиле и авиокомпании, но засега нема потврда за масовно откажување летови како последица на прекинот.

Покрај Outlook и Teams, биле погодени и одредени функции на SharePoint, Copilot, Defender и други деловни алатки.

Одредени проблеми со поврзувањето со услугите на Мајкрософт пријавиле и компаниите OpenAI и Anthropic.

Од Мајкрософт соопштиле дека дефектот најверојатно е поврзан со преоптоварување на дел од серверската инфраструктура, поради што системите повторно откажувале при враќањето на вообичаениот сообраќај.

Инженерите работат на стабилизирање на услугите, а компанијата нагласува дека засега нема докази дека станува збор за сајбер-напад.

Share on Facebook

Tweet

Follow us

Save