Редови пред избирачките места: Почнаа вонредните парламентарни избори во Србија

Во Србија во 7 часот почнаа вонредните парламентарни избори, на кои граѓаните ќе избираат 250 пратеници во новиот состав на Собранието на Србија. На избирачките места во повеќе градови низ Србија од раните утрински часови има гужви, а граѓаните чекаат во редови за да го остварат своето избирачко право.

Избирачките места ќе бидат отворени до 20 часот.

Право на глас имаат 6.451.292 запишани избирачи, а ќе се гласа на 8.392 избирачки места, од кои 93 се во странство.

На изборите учествуваат 18 изборни листи со вкупно 2.418 кандидати, а девет од листите имаат статус на листи на националните малцинства.

Изборниот молк трае до затворањето на избирачките места во 20 часот.

На избирачките места во Белград, каде што граѓаните гласаат за пратеници во Собранието на Србија, од раните утрински часови има гужви, а граѓаните чекаат во редови за да го остварат своето избирачко право, јавуваат известувачите на Танјуг.

На многу избирачки места редиците почнале да се формираат уште пред почетокот на гласањето.

Во Нови Сад гласањето за изборите за Собранието на Србија почна во 7 часот. Право на глас имаат 345.943 граѓани, кои можат да гласаат на вкупно 221 избирачко место.

Во Основното училиште „Соња Маринковиќ“, во населбата Грбавица, во поширокиот центар на Нови Сад, избирачките места 172, 173 и 174 биле отворени навреме, а граѓаните почнале да го остваруваат своето избирачко право уште во раните утрински часови.

Редиците пред речиси сите избирачки места почнале да се формираат околу 5 часот, два часа пред официјалниот почеток на гласањето.

Освен во градските месни заедници, се гласа и во приградските населби, меѓу кои се Сремска Каменица, Лединци, Футог, Ветерник, Каќ, Будисава, Руменка, Кисач и Степановиќево.

За 250 пратенички места се натпреваруваат 18 листи со 2.418 кандидати

На денешните избори за пратеници во Собранието на Србија учествуваат 18 изборни листи, на кои се предложени 2.418 кандидати за 250 места во парламентот.

Од 18-те листи што учествуваат на вонредните парламентарни избори, девет имаат статус на листи на националните малцинства.

На збирната изборна листа се наоѓаат следните листи:

1. Александар Вучиќ – Обединета Србија
2. Ивица Дачиќ – Фактор на стабилноста
3. Студентска листа – Студентите победуваат
4. Расим Љајиќ – Човечки СДП/ЦДП
5. Сојуз на војводинските Унгарци – д-р Балинт Пастор
6. Усаме Зукорлиќ – Движење за обединување
7. Руска партија Србија во БРИКС – Слободан Николиќ
8. Автентична десница – д-р Милош Јовановиќ – Нова ДСС – Монархисти, Српска коалиција – НАДА, Национално-демократска алтернатива, Нова демократска партија на Србија, Движење за Кралството Србија, Одважно српски
9. Европска Србија: Мариника Тепиќ, Здравко Понош, Партија на слободата и правдата, Србија центар – СРЦЕ, Солидарност, Самоодбрана, Ослободување
10. СДА Санџак – Чувари на Санџак
11. Богољуб Кариќ – Движење на силата на Србија – БК
12. Либерално-зелена партија – за слободна и почиста Србија
13. Избирам правда – избирам иднина – коалиција Снага – проф. д-р Ферид Булиќ – Василиос Провелегиос – Партија на иднината и развојот – Граѓанска партија на Грците во Србија
14. Партија на руско-српското единство – Русите и Србите се браќа засекогаш
15. Тато, ова е за тебе – Петар Ѓуриќ, премиер на Србија
16. Владимир Гајиќ – Алтернатива за Србија – Народна партија, Бунт – Вистинска Србија
17. Албанска коалиција
18. Мајка Србија – Груда

Републичката изборна комисија, во рок од 96 часа од приемот на сите збирни извештаи за резултатите од гласањето, донесува и објавува вкупен извештај за резултатите од изборите на сите избирачки места.

Извештајот ги содржи бројот на избирачите запишани во избирачкиот список, бројот на избирачите што излегле на изборите, бројот на избирачите што гласале, бројот на неважечките и важечките гласачки ливчиња, како и бројот на гласови и бројот на мандати што ги освоила секоја изборна листа.

Во распределбата на пратеничките мандати можат да учествуваат само изборните листи што добиле најмалку три отсто од гласовите на избирачите што гласале. Листите на националните малцинства учествуваат во распределбата на мандатите и кога ќе добијат помалку од три отсто од гласовите.

Мандатите се распределуваат според Донтовиот систем. Вкупниот број гласови што ги добила секоја изборна листа се дели со сите броеви од еден до 250, а добиените количници се подредуваат според големината. На секоја листа ѝ припаѓа онолку мандати колку што има свои количници меѓу 250-те најголеми количници на сите листи што учествуваат во распределбата.

Според Законот за избор на народни пратеници, Републичката изборна комисија во рок од десет дена од објавувањето на вкупниот извештај за резултатите од изборите, со одлука им ги доделува мандатите на кандидатите за пратеници според нивниот редослед на изборната листа.

Првата седница на Народното собрание ја закажува претседателот на Собранието од претходниот состав, така што таа треба да се одржи најдоцна 30 дена од денот на прогласувањето на конечните изборни резултати.

На првата седница Народното собрание ги потврдува пратеничките мандати, а се смета за конституирано со потврдувањето на мандатите на две третини од пратениците.

Со потврдувањето на новите мандати престануваат мандатите на претходниот состав на Народното собрание.

Share on Facebook

Tweet

Follow us

Save