ССНМ е загрижен за прогласување на технолошки вишок за новинари во ТВ Телма

Самостојниот синдикат на новинари и медиумски работници со загриженост ги следи најавите од Телевизија Телма за отпуштање новинари и медиумски работници под закрила на спроведување нова систематизација и програма. По целодневната комуникација во која се запозна со предметот и доби инструкции од својот правен тим ССНМ целосно застанува зад својот член.

Според известувањето кое беше доставено до Самостојниот синдикат на новинари и медиумски работници, ТВ Телма започнува процес за прогласување на технолошки вишок во компанијата, заедно со нова програма и прераспределба на работни позиции. Но загрижува фактот што реорганизацијата е насочена само кон едно лице – долгогодишниот уредник и новинар Боби Христов чијашто позиција целосно се укинува и се прогласува за технолошки вишок.

Загриженоста не само за работничките туку и за професионалните права и слободата на новинарите е уште поголема, земајќи го предвид фактот дека реорганизацијата и новата програма директно таргетираат долгогодишен искусен новинар.

ССНМ смета дека ваквите сериозни структурни промени во медиумите кои имаат за задача да го штитат јавниот интерес мора да се прават внимателно, според сите законски прописи, но и имајќи ја предвид чувствителноста на состојбата во медиумската сфера. Во исто време предупредуваме дека ова се случува со докажан новинар и тоа кога во Македонија има недостаток на нови кадри во медиумите и пред сè, независни и новинари со кредибилитет.

ССНМ го повикува раководството на ТВ Телма уште еднаш внимателно да ја разгледа одлуката за прогласување технолошки вишок, притоа земајќи ги целосно предвид правата на работниците.

Share on Facebook

Tweet

Follow us

Save