Стотици луѓе дневно бегаат од градот Славјанск во источна Украина

Стотици луѓе дневно бегаат од градот Славјанск во источна Украина, а бројот на евакуации е речиси двојно зголемен оваа недела, изјави шефот на градската воена управа, Вадим Лајах.

„Бројот на луѓе што го напуштаат градот е речиси двојно зголемен, и со автобуси за евакуација и со сопствени возила, луѓето активно заминуваат“, рече Лајах. Тој рече дека ракетниот напад во кој загинаа три лица во градот во вторникот „ги натера граѓаните да си заминат“.

Околу 70 до 100 луѓе се евакуираат во градот Днипро секој ден, а од 100 до 200 луѓе дневно заминуваат во други делови на Украина, рече Лајах. Протокот на сообраќај што го напушта градот „се зголемува“, додаде тој.

Зголемениот број бегалци значи дека тие додаваат повеќе автобуси за евакуација, за кои луѓето можат однапред да се пријават, рече Лајах. На евакуираните, локалните волонтери им обезбедуваат бесплатна храна и сместување.

Досега, евакуацијата е спроведена безбедно, „без случаи на гранатирање или какви било компликации“, рече тој.

Украинската војска соопшти дека руските единици се зајакнати на приодите кон Славјанск додека се подготвуваат за обновени напади кон градот.

Соседниот Краматорск е најголемата урбана област во Доњецк сè уште под украинска контрола.

Генералштабот на украинската војска вчера соопшти дека Русија концентрира сили до 20 баталјонски тактички групи во областа. Русите се обидоа да извршат напад врз два града северно и северозападно од Славјанск – Барвинкове и Свијатохирск – но не беа успешни.

Нејасно е дали Русите презеле дополнителна територија на исток од Славјанск откако ја освоија контролата врз градот Лиман на крајот од минатиот месец. Украинската страна вели дека руските сили користеле артилерија во две области поблиску до Славјанск – Шчурове и Брусивка, објави Си-Ен-Ен.

Share on Facebook

Tweet

Follow us

Save