Тошковски: Имаме рекордери, двајца возачи во Македонија имаат по 40 забрани за управување возило!

Министерот за внатрешни работи, Панче Тошковски вечерва во емисијата „Заспиј ако можеш“ на телевизија Алфа презентираше загрижувачки податоци за сообраќајната култура и ефикасноста на досегашните санкции, откривајќи дека во Македонија постојат возачи со екстремно голем број забрани за управување возило кои сепак се појавуваат во сообраќајот.

Според статистиката на МВР за последните четири години, најголемиот дел од прекршителите, односно 55.435 граѓани, имаат по една изречена забрана. Сепак, бројките на повратниците во прекршоците се алармантни. Вкупно 7.987 лица се соочиле со втора забрана, додека 1.863 возачи имаат по три правосилни пресуди за забрана за управување возило.

Посебен акцент министерот стави на „рекордерите“ во негативна смисла, посочувајќи дека постојат лица кои десетици пати го изигрувале законот.

„Имаме 687 лица со четири забрани, 291 со пет забрани, а имаме и рекордери – двајца возачи кои имаат по дури 40 изречени забрани за управување моторно возило“, истакна Тошковски.

Тој нагласи дека ваквите фрапантни бројки се доказ за досегашните слабости во контролата, но порача дека со имплементацијата на новиот „паметен систем“, ваквото однесување во сообраќајот веќе нема да биде можно.

„Со овој паметен систем нема повеќе да можат да возат вака“, додаде министерот, потенцирајќи дека целта на „Безбеден град“ е ставање крај на неказнивоста за најекстремните прекршители.

Share on Facebook

Tweet

Follow us

Save