Зеленски оптимист: Можен е достоинствен мир, безбедносните гаранции од САД се подготвени

Украинскиот претседател Володимир Зеленски денеска изрази умерен оптимизам, нагласувајќи дека е „можно да се постигне траен и достоинствен мир“ со Русија. Тој подвлече дека клучната улога ја имаат Соединетите Американски Држави, од кои очекува да останат посветени на создавањето услови за дијалог.

Зеленски во своето редовно обраќање откри дека билатералниот документ со Вашингтон за безбедносни гаранции во периодот по војната е веќе подготвен. Паралелно со тоа, се работи и на плановите за економска реконструкција и развој на земјата.

Интересен пресврт во воената динамика се случи минатиот петок. По серијата жестоки напади врз енергетската мрежа, Кремљ прифати да ги запре ударите врз Киев по лично барање на Доналд Трамп. Како што пренесува „Ле Монд“, Трамп апелирал до Путин да се воздржи од уништување на енергетската инфраструктура поради екстремно ниските температури кои ја зафатија Украина.

„Мерките за смирување на ситуацијата, кои стапија во сила минатиот петок навечер, помагаат во зајакнувањето на довербата на луѓето во процесот на преговори и во можниот исход“, изјави Зеленски.

Сепак, претседателот предупреди дека иако енергетскиот сектор во моментов е поштеден, Москва ја пренасочила својата воена моќ кон логистиката и железничката мрежа. Последниот голем бран напади беше регистриран на 24 јануари.

Во меѓувреме, дипломатијата се сели на Блискиот Исток. Разговорите за мировниот план на Трамп, во кои учествуваат претставници на Русија, Украина и САД, започнаа во Абу Даби, а новата рунда е закажана за оваа среда и четврток

Share on Facebook

Tweet

Follow us

Save