Трамп: „Неверојатно дволичниот“ Иран молеше за разговори, а сега негира дека се случуваат

Американскиот претседател Доналд Трамп во понеделникот изјави дека Вашингтон и Техеран во моментов водат разговори, отфрлајќи ги спротивните тврдења од Иран и обвинувајќи ја Исламската Република дека е „неверојатно дволична“.

Во објава на својата платформа Truth Social, Трамп остро го нападна Иран и инсистираше дека веќе започнале преговори за повторно отворање на Ормускиот теснец, како и дека наскоро се планирани дополнителни разговори.

„Иранското раководство е неверојатно дволично! Тие бараат средба, некои би рекле и дека молат за неа. Разговорите започнаа, а дополнителни се закажани во најскоро време, но тие јавно и гордо велат дека немаат никакви разговори и дека не се разговара за ништо, туку дека преговараат само со Оман“, напиша Трамп.

Тој додаде дека Иран „никогаш нема да има нуклеарно оружје“ и порача дека преговорите претставуваат обид да се најде решение за проблем за кој, според него, Иран е одговорен со децении.

Сепак, американската телевизија CBS News, повикувајќи се на неименувани американски претставници, објави дека не се планирани „нови“ разговори надвор од тековните индиректни преговори меѓу американските претставници Стив Виткоф и Џаред Кушнер и иранската страна.

Иранскиот портпарол на Министерството за надворешни работи, Есмаил Багаеи, претходно во понеделникот изјави дека Техеран „во моментов не преговара со САД“.

„Нашите преговори се со Оман и се однесуваат на обезбедување безбеден премин низ Ормускиот теснец“, изјави тој.

Подоцна истиот ден, зборувајќи со новинарите во Белата куќа, Трамп повторно тврдеше дека САД разговараат со Иран и дека Ормускиот теснец би можел целосно да биде отворен уште во вторник.

Потоа, според него, би следеле разговори за договор со кој би се обезбедила „денуклеаризација“ на Иран.

„Првата фаза е отворање на теснецот. Втората фаза е денуклеаризација. А тоа ќе потрае одредено време“, рече Трамп.

Американскиот претседател ги опиша актуелните разговори со Иран како „последна шанса да се потпише добар договор“.

На прашањето како Американците гледаат на неговите постојани закани кон Техеран, по кои често следи повлекување од најавените акции, Трамп одговори дека покажува трпение поради загриженоста за животите на Иранците.

„Сакам да им ја дадам секоја последна шанса пред обезглавувањето“, рече Трамп, додавајќи: „Се надевам дека ќе се вразумат“.

Трамп исто така изјави дека големите нафтени компании заработуваат „премногу пари“ поради високите цени предизвикани од недостигот на сурова нафта поради војната со Иран.

Тој рече дека одлучил да не нареди нови масовни напади врз Иран по барање на сојузниците од Заливот – Катар, Саудиска Арабија и Обединетите Арапски Емирати.

Според Трамп, американските сили во неделата имале план за изведување на „најголемиот напад од Втората светска војна“, но тој решил да го откаже и да ѝ даде повеќе време на дипломатијата, по разговорите со клучни лидери од Заливот, меѓу кои и саудискиот престолонаследник Мохамед бин Салман, како и по барање на неименувани ирански претставници.

Трамп неколкупати се закануваше со ескалација на нападите врз Иран, но потоа се повлекуваше од своите најави откако САД и Израел започнаа напади на 28 февруари.

Критичарите сметаат дека неговото двоумење можеби покажува дека американската администрација сфаќа оти само воената сила можеби нема да биде доволна за да го натера Иран да отстапи и да стави крај на војната, која Трамп претходно ја претставуваше како конфликт што ќе трае само неколку недели.

Ормускиот теснец останува една од главните пречки во обидите за ставање крај на војната. Откако пропадна прекинот на огнот, Иран повторно го блокираше овој клучен трговски коридор, спречувајќи бродови да минуваат и пукајќи кон комерцијални пловила.

Во неделата, Багаеи изјави за државната телевизија дека е постигнат напредок кон договор со Оман за управување со преминот низ Ормускиот теснец.

„Сега се движиме кон разбирање за рута прифатлива за двете страни – ниту северната, ниту јужната рута – туку таква што ќе ги почитува суверените права на двете страни и ќе ги заштити нашите национални интереси и безбедност“, рече тој.

Сепак, Багаеи нагласи дека таков договор не значи и повторно целосно отворање на Ормускиот теснец.

Share on Facebook

Tweet

Follow us

Save