INFOMAX.MK

Американскиот претседател Доналд Трамп синоќа подетално зборуваше за својата идеја за Триумфалната капија во Вашингтон, опишувајќи ја огромната структура инспирирана од познатиот споменик во Париз, пишуваат американските медиуми.

Во разговор со новинарите во авионот „Ер Форс Уан“ доцна синоќа, американскиот претседател рече дека планираната зграда ќе личи на Триумфалната капија во Париз. Триумфалната капија е наречена „Капија Трамп“ на социјалните мрежи.

Триумфалната капија може да се најде на многу места низ светот, рече Трамп, додавајќи дека сака онаа во Вашингтон да биде најголема.

„Ние сме најголемата, најмоќната нација. Би сакал да биде најголема од сите“, рече Трамп и рече дека ќе се формира комитет за надгледување на проектот.

Триумфалната капија е најновото во низата архитектонски проекти на кои Трамп сака да остави свој белег во Вашингтон. Во тек е изградба на раскошна балска сала на земјиштето на Белата куќа, поради што е срушено старото источно крило на Белата куќа, потег што предизвика критики.

„Вашингтон пост“ уште во октомри лани пишува дека еден план предвидува триумфалната капија да достигне висина од 76 метри. Триумфалната капија во Париз, завршена во 1836 година, е висока околу 50 метри. Архитектите ја критикуваа предложената висина на триумфалната капија во Вашингтон, објави весникот, тврдејќи дека нема да се вклопи со околните згради, додека некои историчари ја поддржуваат идејата за триумфална капија во главниот град на САД.

Трамп минатата недела објави три различни дизајни на триумфалната капија на својата платформа Truth Social. Еден дизајн има многу златни украси, што е негов заштитен знак. Трамп претходно ја редекорираше Овалната соба со златни детали.