Трамп со ултиматум до Иран: Војната може да се избегне со договор, но можеме да уништиме 38 мостови за само еден час!

Американскиот претседател Доналд Трамп изјави дека нова војна со Иран може да се избегне доколку Техеран прифати „многу силен договор“ со Вашингтон, но истовремено упати сериозно предупредување дека американската војска е подготвена за разорни напади врз иранската инфраструктура.

Во телефонско интервју за Си-Ен-Ен, Трамп оцени дека е „многу малку веројатно“ да биде потребно продолжување на големите воени операции, доколку преговорите меѓу двете земји продолжат да напредуваат.

„Тоа зависи од тоа дали ќе потпишат многу силен договор“, изјави американскиот претседател, нагласувајќи дека дипломатското решение останува можна опција.

Сепак, Трамп истовремено откри дека американската војска веќе има идентификувано десетици инфраструктурни цели на територијата на Иран, вклучително и мостови и електроенергетски објекти.

„Имаме 38 мостови на нишан кои можеме да ги урнеме буквално за еден час. Сите ќе бидат уништени“, предупреди Трамп.

Американскиот претседател додаде дека не сака да нареди уништување на ваквата инфраструктура, бидејќи нејзината реконструкција би можела да трае и десет години.

Тој истакна дека американските вооружени сили располагаат со доволно капацитети за продолжување на операциите, посочувајќи дека во регионот се распоредени три носачи на авиони, подготвени за евентуална воена интервенција.

Изјавите доаѓаат во момент на интензивни дипломатски активности насочени кон постигнување договор за иранската нуклеарна програма и повторно воспоставување на слободната пловидба низ Ормускиот Теснец.

Според претходните информации на американските медиуми, Катар посредува во разговорите меѓу Вашингтон и Техеран, додека американската администрација разгледува повеќе можни сценарија, вклучително и дипломатски договор, продолжување на економскиот притисок или нови воени удари.

Иако најновите изјави на Трамп оставаат простор за дипломатско решение, неговото предупредување за уништување на иранската инфраструктура покажува дека можноста за нова воена ескалација сè уште не е исклучена.

Share on Facebook

Tweet

Follow us

Save