Украина и Русија покажале „мала флексибилност“ за територијалните прашања пред почетокот на преговорите во Абу Даби

Украина и Русија во неформални разговори покажале „мала доза флексибилност“ во врска со спорните територии, објавија американски медиуми, повикувајќи се на висок претставник на американската администрација. Изјавата доаѓа во момент кога во Абу Даби започнува нова рунда преговори за завршување на војната што Москва ја води против Украина.

Американскиот претседател Доналд Трамп претходно изјави дека Украина би можела да излезе од војната со „малку поинаква форма“, без да прецизира на какви територијални промени мисли.

Москва бара Украина да ја признае руската контрола врз Крим и врз четирите региони за кои Русија тврди дека ги анектирала – Доњецк, Луганск, Запорожје и Херсон. Кремљ бара и украинските сили да се повлечат од сите четири региони, вклучително и од областите што руската војска никогаш не ги окупирала. Киев ги отфрла овие барања.

Американскиот претставник не открил детали за наводната флексибилност, но предупредил дека територијалните спорови не можат да се решат без договор за безбедносните гаранции по завршувањето на војната.

„Прашањето за Доњецк и територијалното прашање нема да бидат решени сè додека не знаат како ќе изгледа безбедносната архитектура по војната“, изјавил тој.

Пред преговорите, украинскиот претседател Володимир Зеленски најави дека Киев ќе предложи чекори за намалување на непријателствата и ќе бара договор за организирање трилатерална средба на лидерско ниво меѓу Украина, Русија и САД.

„На средбите во Абу Даби, нашиот тим ќе предложи чекори за деескалација, а мора да има и разбирање како да се организира трилатерална средба на највисоко ниво, за оваа војна да заврши праведно и вистински“, напиша Зеленски на платформата Икс.

Преговорите започнаа со консултации со европските претставници

Преговорите во вторникот започнаа со средба меѓу украински, американски и европски претставници, пред првите трилатерални разговори меѓу Киев, Москва и Вашингтон од февруари досега.

Главниот украински преговарач Рустем Умеров соопшти дека на почетната средба присуствувале претставници на Велика Британија, Франција, Германија, Италија, НАТО и Европската комисија, како и американските претставници Стив Виткоф и Џаред Кушнер.

„Ќе ги усогласиме нашите позиции и ќе ги координираме чекорите пред следната фаза од преговорите“, изјави Умеров, мислејќи на разговорите во трилатерален формат со Русија.

Како приоритети на Украина ги посочи прекинот на непријателствата, безбедносните гаранции по војната, економското закрепнување и хуманитарните мерки.

Безбедносни гаранции по војната

Европските лидери бараат поголема улога во дипломатскиот процес предводен од САД, особено поради можноста за нови безбедносни договори што би можеле да ја променат безбедносната архитектура на Европа.

„За да се заврши војната, Европа мора да биде на преговарачката маса“, изјавил висок американски претставник пред почетокот на разговорите.

Според американските медиуми, Вашингтон и Москва разговарале за можни безбедносни гаранции за Украина, слични на одредбите од член 4 и член 5 на НАТО. Тие предвидуваат консултации во случај на безбедносна закана и колективна одбрана.

Американскиот претставник, според извештаите, ја споменал и можноста за обновување на Советот НАТО-Русија, чии активности се суспендирани од 2022 година, како и воведување механизам за автоматско повторно активирање на санкциите против Москва доколку Русија го прекрши евентуалниот прекин на огнот.

Во меѓувреме, продолжуваат руските напади врз украинската инфраструктура. Во обраќањето во понеделникот навечер, Зеленски предупреди дека Москва се обидува да ја подели Украина долж реката Днепар, напаѓајќи мостови и електроенергетската мрежа.

„Русија се обидува да ја подели Украина долж Днепар и максимално да им го отежни животот на луѓето, на нашите градови и села“, изјави Зеленски.

И покрај обновените дипломатски напори, Вашингтон предупредува дека не треба да се очекува брз пробив во преговорите.

Американскиот претставник Џаред Кушнер оцени дека разговорите би можеле да создадат „позитивен импулс за следната фаза од преговорите“, но го опиша конфликтот како исклучително тежок и сложен.

Share on Facebook

Tweet

Follow us

Save