Урко: Напаѓаме две светски злата, македонските кикбоксери газат во Италија

​Македонската кикбокс репрезентација испишува историја на Светското младинско првенство во Језоло, каде нашите борци демонстрираат светска класа, лавовско срце и немилосрдна борбеност. Ден исполнет со адреналин, брилијантни победи и осигурани медали ја крена Македонија на нозе. Томи Андонов уште еднаш покажа зошто е апсолутен владетел во рингот, забележувајќи маестрална победа над Ринат Уралбај од Казахстан, со што си обезбеди место во големото финале. Кон светскиот врв маршира и феноменалниот Глигор Николов, кој со импресивен триумф обезбеди уште едно финале за нашата држава.

​Успесите не застануваат тука, бидејќи македонскиот тим доминира и на татамите. Драгица Глигорова блесна во дисциплината Кик Лајт, остварувајќи голема победа со која веќе ја осигура бронзата и мотивирано чекори кон полуфиналето. Истовремено, Петар Лозановски во машка и херојска битка беше запрен во своето полуфинале, но гордо се враќа со освоен бронзен медал, потврдувајќи го својот огромен талент.

​Селекторот на македонската репрезентација, Дејан Митровски Урко, не го криеше своето задоволство од блескавите изданија на своите избраници, но и реално се осврна на предизвиците кои ги носи овој суров спорт.

​„Задоволен сум од досегашниот постигнат успех на сите наши натпреварувачи. Имаме две финалиња со Томи Андонов против Србин и Глигор Николов против Азербејџанец. Две полуфиналиња со Драгица Глигорова против Италијанка и Калин Бабоски против Казахстанец. Да напоменам, за мене од моја страна неочекувани порази имаа Марија Димовска, Марко Баснарков, Туркер Исмаил и Андреј Смилевски. За жал останаа без медали иако беа фаворити за злато, но треба и среќа, исто така и да не те казнат судии или да не те повреди противникот, но тоа е во нашиот спорт. Одиме утре или задутре, имаме две финалиња, две полуфиналиња и една освоена бронза“, изјави селекторот Урко.

​Македонија со нетрпение ги очекува завршните битки. Нашите борци покажаа како со крв и пот се бранат националните бои, а сега преостануваат финалните чекори кон освојување на светскиот трон.

Share on Facebook

Tweet

Follow us

Save