Фон дер Лајен најави дополнителни средства за дронови и ракети за Украина: „Војната влезе во нова, помрачна фаза“

Претседателката на Европската комисија, Урсула фон дер Лајен, најави дополнително европско финансирање за дронови и ракети за Украина, по телефонскиот разговор со украинскиот претседател Володимир Зеленски во неделата, на 11 октомври.

Во објава на социјалната мрежа Икс, таа изрази целосна поддршка за неговиот повик за примирје што би ги заштитило глобалните резерви на храна и енергетската инфраструктура во Украина и Русија.

„Војната влезе во нова, помрачна фаза. Русија стагнира на бојното поле и напаѓа цивили далеку зад линиите на фронтот“, оцени Фон дер Лајен.

Таа нагласи дека на Зеленски му ја пренела солидарноста со украинскиот народ и поддршката за неговото раководење со борбата за слобода на земјата.

Според најавата, Украина ќе биде во фокусот на претстојниот состанок на Европскиот совет. Европските лидери ќе разговараат за финансиските потреби на земјата за наредната година и за начините за обезбедување дополнителна меѓународна поддршка.

Фон дер Лајен посочи дека ЕУ во текот на неделата ќе обезбеди нови средства за дронови и ракети, со цел јакнење на украинската одбрана и заштита на нејзиниот воздушен простор. Во објавата не се наведени износот на финансирањето или конкретните системи што ќе бидат опфатени.

Претседателката на Европската комисија најави и дека се очекува отворање уште два кластера преговарачки поглавја во процесот за пристапување на Украина во Европската Унија.

„Динамиката е реална“, порача таа, истакнувајќи го напредокот во пристапните преговори паралелно со продолжувањето на европската поддршка за Киев.

Share on Facebook

Tweet

Follow us

Save