(Фото+Видео) Што се случувало на концертот на Војаж вчера во Охрид ?

Никаков инцидент не се случил на вчерашниот концерт на Војаж во Охрид, велат од СВР Охрид за Инфомакс, откако во медиумите и на социјалните мрежи се појавија информации за наводни инциденти и обид за убиство за време на настапот.

– Нема никаква интервенција од страна на полицијата, не е вистина она што се шири на социјалните мрежи. Брзата помош има две интервенции за лица во алкохолизирана состојба, а во МВР не бил пријавен ниту бил евидентиран било каков инцидент или обид за убиство, велат од СВР Охрид.

Претходно на социјалните мрежи и во балканските медиуми се појавија информации за наводен обид за убиство, поради кој бил прекинат концертот.

Се огласи и музичарот кој напиша:

-Поради интервенција на полицијата бев принуден да го прекинам настапот во Охрид. Поради преголемата посетеност и безбедносната проценка на државните органи, интервентната единица реагираше и го прекина настапот и ме симна од сцената – напиша Војаж, а потоа додаде:

– Охрид, ти бевте одлични! Многу ми е жал што настапот беше прекинат, бидејќи енергијата беше неверојатна, но не можеме да одиме против одлуките на државните органи. Се надевам дека наскоро ќе успееме да го надоместиме ова и да направиме уште поголем спектакл. Војаж ве сака и ви благодарам на разбирањето – рече младиот трапер.

Јавноста и медиумите мора да внимаваат на вестите кои се споделуваат, особено на сензитивна содржина која предизвикува страв, паника и нетрпение меѓу граѓаните. Ги охрабруваме МВР и сите надлежни институции да ги пронајдат лицата кои шират лажни и непроверени информации и соодветно да ги санкционираат.

Share on Facebook

Tweet

Follow us

Save