Хулио Иглесијас по железничката трагедија во Шпанија: „Сите можевме да бидеме во тој воз“

Шпанскиот пејач Хулио Иглесијас се огласи по тешката железничка несреќа во близина на Толедо, во која загинаа најмалку 68 лица. На социјалните мрежи објави порака со сочувство до семејствата на жртвите, но и остри критики за одржувањето на инфраструктурата. За разлика од вообичаените пораки на поддршка по вакви трагедии, тој своето обраќање го започна со еден збор: „Неправда“, пишува „ОК Диарио“.

„Напредокот бара темелна контрола“

Во својата објава Иглесијас ја поврза технолошката модернизација со одговорноста за безбедноста на луѓето. Според него, напредокот во технологијата и комуникациите мора да биде проследен со сериозна грижа и постојан надзор.

„Животот и новите технологии овозможуваат побрза комуникација и модернизација на сè, но истовремено бараат длабока грижа и надзор“, напиша пејачот.

Тој нагласи дека секој напредок мора да биде придружен со внимателна проверка на веќе изградените објекти и системи.

„Сè што напредува во животот мора да биде проследено и со темелна проверка на она што е изградено“, истакна Иглесијас.

Во најостриот дел од пораката, пејачот ја поврза трагедијата со, како што смета, недоволната грижа за инфраструктурата.

„Луѓето што ги загубија животите, нивните семејства, пријателите, сите што ги сакаат и сите ние што длабоко го сакаме животот сме очајни затоа што не биле почитувани правилата за одржување на современите инфраструктурни системи“, напиша тој.

Со оваа изјава Иглесијас алудираше на можни пропусти во одржувањето на железницата, иако официјалната истрага сè уште не го потврдила тоа како причина за несреќата.

Особено внимание привлече неговата реченица: „Сите можевме да бидеме во тој воз“.

Со неа тој потсети дека трагедијата можела да го погоди секого. Пораката ја заврши со изрази на сочувство кон загинатите и нивните семејства.

„Мојата љубов и сочувство се со душите на оние што нè напуштија и со нивните семејства, кои денес се очајни поради недостигот од грижа за новата инфраструктура“, порача пејачот.

Тој додаде: „И мојата душа можеше да патува во тој воз заедно со сите нас“.

Судир на два воза во близина на Толедо

Тешката железничка несреќа се случила во средата, на 28 октомври, во 8:53 часот, во близина на местото Урда во Шпанија. Брзиот воз на компанијата „Ренфе“ (Renfe), кој сообраќал на линијата Мадрид – Севиља, се судрил со воз на компанијата „Ирио“ (Iryo), кој стоел на истата пруга. Од силниот удар неколку вагони излетале од шините. Според привремените податоци наведени во извештајот, загинале најмалку 68 лица: 44 патници од возот на „Ирио“ и 24 од брзиот воз на „Ренфе“.

До четвртокот наутро, 53 лица биле хоспитализирани, од кои 15 биле во тешка состојба.

Истрагата испитува можен пропуст во управувањето со железничкиот сообраќај

Причините за несреќата сè уште се истражуваат, а првичните информации упатуваат на можна грешка во управувањето со железничкиот сообраќај.

Шпанскиот министер за транспорт Оскар Пуенте објасни дека безбедносниот систем „Ел-зе-бе“ (LZB) престанал да работи во 8:30 часот, по што неколку возови биле запрени.

Шест минути подоцна, контролниот центар на компанијата „Адиф“ (Adif) му дозволил на брзиот воз на „Ренфе“ да продолжи со движењето, иако возот на „Ирио“ сè уште стоел на пругата.

Министерот ја нарекол таа одлука „неразбирлива“, но нагласил дека техничката и судската истрага допрва треба да ги утврдат сите околности и евентуалната одговорност.

Спасувачките екипи и понатаму работат на терен и ги извлекуваат телата од остатоците на уништените вагони. Претседателот на регионот Кастиља-Ла Манча, Емилијано Гарсија-Пахе, предупредил дека бројот на загинати може да се зголеми кога ќе започне отстранувањето на уништените вагони.

Железничкиот сообраќај на брзите линии меѓу Мадрид и Андалузија е во прекин, а „Ренфе“ најави дека од петок, 30 октомври, ќе организира алтернативен превоз.

Share on Facebook

Tweet

Follow us

Save