Антиевропски политки: Белорусија ја проширува листата на дела кои ќе се казнуваат со смртна казна

Белорусија ги започна обидите за проширување на листата за најстрогата казна, со кои терористичките акти ќе се казнуваат со смртна казна, откако активистите се обидоа да саботираат делови од железничката мрежа за да ѝ отежнат на Русија да распореди сили во Украина за нејзината инвазија, јави Ројтерс.

Долниот дом на белорускиот парламент ја одобри промената на кривичниот законик во две читања, објави новинската агенција Белта. За промената сега е потребна поддршка од Горниот дом и белорускиот лидер Александар Лукашенко пред да стапи на сила.

„Деструктивните сили ја продолжуваат терористичката и екстремистичката активност обидувајќи се да ја потресат ситуацијата во Белорусија, предизвикувајќи домашна нестабилност и конфликти“, рече претседателот на домот Владимир Андрејченко, алудирајќи на чиновите на саботажа на железницата.

„Се преземаат активности за оневозможување на железничката опрема и пругите, кои се објекти од стратешко значење“, рече тој. „Не може да има оправдување за акциите на терористите“.

Русија ја искористи поранешната советска Белорусија, близок сојузник, како терен за да ја започне својата инвазија на Украина на 24 февруари. Минск негира вмешаност во конфликтот, но признава дека нејзината територија била искористена за инвазијата.

За време на нападот, опозициските медиуми објавија дека биле извршени акти на саботажа на белоруската железница со цел да се обидат да го забават напредокот на руските сили.

Тие извештаи велат дека тие биле насочени кон специфична инфраструктура за да исфрлат некои делови од железницата.

Белоруската опозиција која ги повика Белорусите да ги блокираат патиштата, соопшти дека имало десетици акти на саботажа.

Белоруската полиција на почетокот на април соопшти дека привела најмалку две групи саботери и дека тие отвориле оган во еден од случаите. Најмалку две лица биле ранети.

Јавниот обвинител на Белорусија ги обвини активистите за тероризам.

Белорусија во моментов има смртна казна за акти на тероризам кои предизвикуваат загуба на животи, брутални убиства и повеќекратни убиства.

Во задушувањето на антивладините протести во 2020-та година, неколку луѓе беа обвинети за тероризам за злосторства кои порано можеби се сметале за хулиганство.

Истражниот комитет, на пример, соопшти дека едно лице е обвинето за тероризам за истурање црвена боја врз автомобилот на судијата, а друго обвинето за кривично дело за фрлање камен на прозорецот на обвинителот.