INFOMAX.MK

Македонија вечерва го отвора осмиот евроквалификациски циклус за пласман на континентално првенство, во „група на смртта“, во која прва битка на црвено-жолтите е домашна пресметка со аутсајдерот во групата Малта, меч кој мора да се победи.

Македонската селекција од јуни кога двапати го победи Гибралтар во Лигата на нации нема триумф, па да се излечат сите рани, Малта е добредојдена, меѓудругото и да се сврти нов лист после неуспешниот последен циклус.

„Според последните резултати на овој тим, пласман на Европско првенство, финале во баражот за настап на Светскиот шампионат амбициите сигурно се големи. Но, сето тоа мораме да го заборавиме и да се фокусираме на тоа што нѐ очекува. Посебно за овој прв натпревар со Малта. За нас е многу важно да почнеме со победа бидејќи нашата цел во оваа тешка група е да забележиме што е можно повисок пласман. Знаеме дека можеме да играме против сите репрезентации, но на секој натпревар мораме да одиграме најдобро што можеме”, вели македонскиот репрезентативен фудбалер за врска Енис Барди.

Македонија е во група со европскиот првак Италија, европскиот вицепрвак Англија и секогаш незгодната Украина, најтешката група во овој квалификациски циклус за Еуро 2024 во Германија.

Извор: sport1.mk