Битиќи: Не се знае колкаво ќе биде поскапувањето на струјата, се уште се калкулира

Данокот на додадена вредност (ДДВ) за електричната енергија до крајот на годината ќе остане 5%, рече денеска вицепремиерот за економски прашања Фатмир Битиќи.

Битиќи нагласи дека засега не може да се каже колкаво ќе биде евентуалното поскапување на струјата.

Се уште се прават калкулациите за менување на тарифникот кој според Битиќи ќе биде праведен и правичен, според потрошувачката.

Со новиот модел на тарифирање, дециден е Битиќи, најранливите категории граѓани ќе бидат заштитени. За стопанството, пак, со ребалансот на Буџетот се предвидени 67 милиони евра поддршка.

-Во овој момент се прават сите калкулации на менување на тарифникот и тарифата на дефинирање на цената на електричната енергија. Секако, најранливите категории граѓани ќе бидат заштитени со новиот модел на тарифирање. Тие што се најранливи, ќе плаќаат најмалку – тоа нема да значи можеби зголемување, туку намалување на тарифата за најпогодените. Наскоро ќе го видиме моделот. Ќе се направи праведно и правично тарифирање на електирчната енергија, според потрошувачката. Ние сме кажале и стоиме на тоа дека не може и тие кои се на регулиран пазар, а се големи потрошувачи да плаќаат иста, субвенционирана цена како секој друг граѓанин, истакна Битиќи, одговорајќи на новинарски прашања по посетата на фабриката „Брако“ во Велес.

Тој објасни дека се уште се прават финалните калкулации дали потребата на ЕВН ќе ја обезбеди ЕСМ, дали домашните капацитети за производство се доволни да ја испорачаат енергијата и дали ќе има потреба од увоз. Според законот, потсети Битиќи, ЕСМ треба да обезбеди 60 отсто од потребите на ЕВН.

Share on Facebook

Tweet

Follow us

Save