INFOMAX.MK

Скопјанецот Горјан Гого Славески, кој веќе подолго време се натпреварува во боречки вештини во САД, продолжува со фантастичните настапи во бокс со голи раце, откако ноќеска дојде и до петтата победа по ред во БКФЦ серијата совладувајќи го со нокаут Кубанецот Јосденис Чедено.

Ова беше елиминаторска борба за добивање шанса за пресметка за титула во велтер категоријата, што значи дека шестиот дуел за македонскиот боксер ќе биде за престижниот шампионски појас.

„Македонски народе, одиме по светска титула!“, викаше Гого на мајчиниот јазик по големата победа, а пред преполната арена каде што беше промовиран во прв кандидат за предизвикување на актуелниот шампион.

Славески е веќе 28-годишен спортист, кој веќе години наназад живее и тренира во Мајами, а со бокс се занимава уште од 17-годишна возраст кога почнал да ја претставува Македонија на регионална сцена. Со боксот без ракавици се занимава повеќе од една година, а неговиот скор 5-0 е само потврда дека можеби ја пронашол вистинската дисциплина во која ќе експлодира и на светска сцена.

Извор: sport1.mk