INFOMAX.MK

Попладнево во полициска станица во Центар, на информативен разговор, по големиот собир на плоштадот „Македонија“, беа повикани главниот уредник на ТВ21, Ерол Шакири и новинарот и уредник на вести, Јовица Пауноски.

Објаснувањето на полицијата било дека се повикани затоа што оделе во живо со снимки од дрон кој тежел повеќе од дозволеното, но и во моментот имало активна забрана за дронови во Скопје. Во станица покрај полицијата, имало и инспектори од Агенцијата за национална безбедност.

Со свое сведоштво за настанот излегоа токму колегите кои истакнаа дека МВР ги посетила и ги земала сите потребни документи, по што по кратко време повторно се вратиле и ги повикале на разговор.

„Практично користевме дрон како што и во претходните две-три години го правиме тоа со цел да пренесеме вистинска слика и тоа што е јавен интерес и граѓаните да бидат навремено информирани. Проблемот кој се јави, бевме известени дека има целосна забрана за летање на било каков дрон на територија на Скопје, Штип и Кочани“, вели колегата Јовица Пауноски.

Како што велат, соопштението за активната забрана за Штип и Кочани е добиено 10 минути откако веќе биле во полициската станица, по што добиле информација дека истото ќе биде надградено и ажурирано.

„Користевме дрон кој што е под 245 гр. кој со последните измени на законот кој што наводно биле донесени во месец јануари, тие законски параметри биле симнати и сега дрон може да се лета без посебна најава и дозвола само со 200 гр.“, додава Пауноски.

На ова се надоврза и Шакири кој нагласи дека ТВ21 секогаш работи по закон, и никогаш до сега не прекршила закон.

„За дрон под 245 грама не треба дозвола за летање и сертификати, ние тој дрон секогаш сме го користеле. Сега наводно, и ние сега ја дознавме информацијата, законот е сменет во јануари и грамажата е смалена на 200 грама, меѓутоа за тоа ние дознаваме денеска затоа што на страната се уште нема нова информација“, вели Шакири.

ЛИНК од видеото

ИЗВОР: ТВ21