(Видео) Мислиме дека ве … Патот на Мицкоски од никогаш Северна до никогаш Македонија

Претседателот на ВМРО-ДПМНЕ, Христијан Мицкоски на 4.12.2019-та година за ТВ 21 изјави дека ако во иднина биде премиер, ќе го употребува името Македонија, и по цена да му го одземат мандатот.

-Ова е за мене Македонија и Македонија ќе остане. За да се случи промена на Уставот, ние чесно пред граѓаните ќе излеземе со две понуди. Се знае, за да се промени Уставот, за да отидеме ние чекор назад, мора да имаме 80 пратеници и услов Бадинтер. Ме прашувате зошто го употребувам името Македонија. Јас ви давам одговор, никогаш нема на митинг, на состанок, да го употребам името со новата придавка. Грев ли е да викам Македонија? Нека ми го земат мандатот. Кажувам отворено, никогаш нема да ја кажам придавката на новото име. Никогаш, нека ми го земат и мандатот, рече Мицкоски.

Пред неколку дена Мицкоски целосно ретерираше од својата цврста позиција дека никогаш нема да каже Република Северна Македонија.

Заклетвата како нов премиер ќе ја даде со уставното име на државата кое е содржано во новиот собраниски деловник, порача мандатарот Мицкоски во интервју за Сител.

-Не можеме да се однесуваме со двојни стандарди, не можеме да бараме од граѓаните да ги почитуваат законите и уставот, а ние да не ги почитуваме. Но, во моите настапи дома и во давањето изјави ќе го користам името на мојата држава, а тоа е Македонија, изјави вечерва лидерот на ВМРО-ДПМНЕ и мандатар за состав на новата влада, Христијан Мицкоски.

На прашање, што да очекуваат граѓаните, на која држава ќе биде премиер Христијан Мицкоски и што ќе каже во заклетвата, тој рече дека “уставното име е со придавката”.

-Па, уставното име на држава, јасно, не треба тука ние сега да имаме двојни стандарди и да се чувствуваме пред граѓаните неодговорни или, пак, граѓаните да ги доведуваме во заблуда. Се знае уставното име е со придавката и логично е, Деловникот за работа на парламентот е променет, а во самиот Деловник е содржана заклетвата. Се разбира дека ќе го кажам уставното име на државата, не гледам друг начин како да се каже таа заклетва за да не биде понатаму главна тема. Сакам да ја затворам таа тема бидејќи нас не очекуваат реформи, не очекуваат подобри времиња за Македонија. Инаку, како што кажав во минатото, така ќе кажам и во вашата емисија дека при моите изјави во Македонија, при моите говори, секогаш јас ќе си го користам името Македонија како име на мојата татковина и тука не треба да имаме дилема. Тука немам намера да правам компромиси бидејќи тоа е моето загарантирано човеково право, изјави Мицкоски во интервјуто за Сител.

Share on Facebook

Tweet

Follow us

Save