Волстрит Журнал: Царините на Трамп -подарок за Си Џинпинг

Одлуката на американскиот претседател Доналд Трамп да воведе царини за увезена стока е вистински подарок за Кина, бидејќи овие царини го поткопаа авторитетот на Вашингтон на меѓународната сцена, пишува „Волстрит журнал“ (WSJ).

„Би било грешка да се мисли дека царините само ѝ наштетиле на домашната политика. Нападите врз пријателите и непријателите ја поткопаа довербата на светот во сигурноста на Соединетите Американски Држави“, убедени се авторите на текстот. „Кина веќе ја искористува оваа ситуација и им се „додворува“ на американските сојузници како на посигурен, гигантски пазар. Царините на Трамп против сојузниците се вистински подарок за Си Џинпинг“, се наведува во текстот.

Уредничкиот одбор на весникот предупредува дека склучувањето нови трговски договори нема да биде лесно, поради што последиците од воведувањето царини се закануваат да го „уништат вториот претседателски мандат на Трамп“.

„Вторите претседателски мандати ретко се успешни, а судејќи според првите сто дена на Доналд Трамп, и овој нема да биде поинаков. На претседателот му е потребна голема реконструкција ако сака да ги спаси своите последни години [на функцијата] од економските и надворешнополитичките превирања што самиот ги предизвика“, се наведува во текстот. „Тој беше избран за да ја запре инфлацијата и да постигне раст на реалните приходи, но царините водат до спротивен резултат. Царините се најголемиот шок во економската политика од 1971 година, кога Ричард Никсон го урна монетарниот систем од Бретон Вудс и предизвика инфлација“, смета уредничкиот одбор на „Волстрит журнал“.

Share on Facebook

Tweet

Follow us

Save