„Вонредна состојба со слободата на медиумите во Србија„ – Европската федерација со препораки до властите: Прекинете ги нападите врз новинарите!

Во пресрет на Светскиот ден на слободата на печатот, Европската федерација на новинари (EFJ) објави извештај од мисијата за брза реакција за слобода на медиумите (MFRR), кој содржи алармантни наоди за влошување на слободата на медиумите во Србија.

Мисијата за солидарност на MFRR беше спроведена во Белград и Нови Сад од 7 до 9 април, со постојан мониторинг, и воспостави ситуација што може да се опише како вонредна и бара итно внимание и акција од страна на српските власти и ЕУ, објави EFJ, пренесе N1.

Иако кризата со слободата на медиумите трае со години, известувањето за трагичното уривање на настрешницата на железничката станица во Нови Сад доведе до уште поголем притисок врз новинарите низ цела Србија, вклучувајќи ги и младите новинари и студентите по новинарство, се вели во извештајот. Од цензура, политички притисок, зголемена контрола на медиумите, немилосрдни кампањи за клевета, злоупотребувачки тужби и секојдневни закани по живот – медиумските работници се соочуваат со непријателска средина во која сторителите – вклучувајќи ги и државните органи и службеници – работат неказнето, се истакнува во документот.

Истрагите за закани, кога се започнати, ретко се ефикасни, а уште поретко се завршуваат, служејќи повеќе како формалност отколку како искрен обид да се обезбеди правда и заштита на новинарите. Спречени да ја извршуваат својата вообичаена работа, новинарите се соочуваат со постојани напади, отфрлања и обиди за нивна дискредитација, што е штетно за правото на граѓаните да бидат информирани слободно и непристрасно.

За време на мисијата на солидарност, партнерите на MFRR се сретнаа со новинари од приватни и државни медиуми, синдикати и организации на граѓанското општество. Делегацијата се сретна и со претставници на Републичкото јавно обвинителство и на српската полиција, како и со претставници на Канцеларијата на Европската Унија во Белград, Советот на Европа (СЕ) и Организацијата за безбедност и соработка во Европа (ОБСЕ). Меѓу наодите на MFRR се и сериозните неуспеси на српските власти да ги заштитат новинарите, што е спротивно на заштитата на слободата на изразување предвидена со Европската конвенција за човекови права (ЕКЧП) и одредниците во Поглавје 23 (Судство и фундаментални права) во рамките на преговорите за пристапување во ЕУ.

Клучни препораки за српските власти, вклучително и за претседателот на Србија:

Прекинете и осудете ги сите јавни напади врз медиумите и новинарите .

Запирање на сите нелегални полициски акции против медиумите, вклучително и рации во редакциите .

Стоп за нелегалната употреба на шпионски софтвер против новинари и граѓанско општество.

Обезбедете соодветна обука за припадниците на полицијата и судството.

Обезбедете темелни и брзи истраги за напади врз медиуми и новинари, вклучително и нерешени убиства.

Обезбедете новиот процес за избор на членови на Советот на REM да биде фер, независен и транспарентен, ослободен од политичко влијание.

Обезбедете ја независноста на јавниот сервис.

Share on Facebook

Tweet

Follow us

Save