INFOMAX.MK

Швајцарската драма „Сигурност“, во режија на Кармен Штадлер, денеска и утре од 19 часот се прикажува во Центарот за култура „Григор Прличев“ во Охрид.

Филмот имаше премиера на „Блек најтс филм фестивал“ (Black Nights Film Festival) во Талин во 2019 година. Станува збор за разиграно, меланхолично ноктурно, кое е истовремено секојдневна приказна и бајка.

Канцелариската зграда, која набргу ќе биде урната, има последна желба: да ѝ се случи љубовна приказна. Во таа приказна се вклучуваат најчудните ликови – осамениците на ноќната смена: мистериозната чуварка, која е воздржана и неспокојна поради нејзината работа, осамениот хигиеничар, Арап што слуша радиовести од родниот град, збунетиот секретар кој копнее по семејство, откачениот готвач кој експериментира на својот последен рецепт и шефот што го вежба својот завршен говор пред празни столчиња.

Сите тие изгубиле нешто што се надеваат дека повторно ќе го најдат во текот на ноќта. Шест ноќи се среќаваат и набљудуваат, се избегнуваат и се привлекуваат како магнети. А кога нештата ќе стивнат, зградата предизвикува прекин на струјата. Поетски и ексцентричен калеидоскоп во кој се рефлектираат копнежот, сигурноста и милозвучните звуци што се движат низ целата зграда.