Дачиќ: Во интерес на Србија е да бидам премиер

Претседателот на Социјалистичката партија на Србија (СПС), Ивица Дачиќ изјави дека за неговата кандидатура за премиер по неделните вонредни избори може сериозно да се разговара само по објавувањето на изборните резултати, но дека во најдобар интерес на Србија ќе биде тој да биде на чело на Владата, јави дописникот на МИА од Белград.

Дачиќ, кој е носител на изборната листа на СПС „Ивица Дачиќ – премиер на Србија“, во интервју за агенцијата Бета изјави дека идниот премиер ќе биде од партијата или коалицијата што ќе освои најмногу гласови од граѓаните на претстојните избори.

– Нормално е јас пред коалицијата СПС-Единствена Србија да бидам кандидат за премиер, како што некогаш беше Александар Вучиќ пред Српската напредна странка (СНС), а не некој десетти. Веруваме дека во најдобар интерес на Србија е јас да бидам премиер, но секако дека премиерот ќе го предложи партијата или коалицијата што ќе освои најмногу гласови од граѓаните на претстојните избори, рече тој.

Дачиќ додаде дека целта на СПС е заедно со СНС и Вучиќ да има парламентарно и советничко мнозинство во Белград.

Дачиќ рече дека дури по објавувањето на изборните резултати сериозно ќе се дискутира за тоа.

– За мојата кандидатура може да се разговара само по објавувањето на изборните резултати и тоа сигурно нема да биде начин за уцени на кој било, нагласи тој.

Запрашан да ги дефинира трите најголеми проблеми со кои се соочуваат жителите на Србија, Дачиќ рече дека позиционирањето на одредени прашања често зависи од актуелните настани.

– Прашањето на Косово и Метохија во некоја мирна ситуација не е на врвот на интересот на граѓаните. Друго прашање е социјалната и економската положба на луѓето и нивната желба да го подобрат животниот стандард и безбедноста на работата. Како трет проблем е општата грижа за надградба на социјалната структура, како што се образовниот и здравствениот систем и состојбата на животната средина, рече Дачиќ.

Коментирајќи ги наводите на одредени аналитичари дека СПС, повикувајќи се на поранешниот претседател Слободан Милошевиќ, води регресивна кампања најавувајќи враќање во 1990-тите, Дачиќ рече дека овие тврдења се „глупости“.

– Не се повикуваме на Слободан Милошевиќ, туку само одговараме на тврдењата на опозицијата дека „ќе се случи 6 октомври“ (падот на Милошевиќ). Јас им одговорив дека 6 октомври нема да биде затоа што веќе нема да има 5 октомври. Опозицијата сега трескавично се обидува да најде замена за (Воислав) Коштуница, бидејќи позициите на квази-европската и квази-патриотската опозиција не се во согласност со националните интереси на Србија кога станува збор за односите со Република Српска, Косово и Метохија или НАТО, рече Дачиќ.

Тој додаде дека Слободан Милошевиќ и Тито (Јосип Броз) се минато време.

Во недела, на 17 декември во Србија ќе се одржат вонредни парламентарни, покраински, локални и избори за градот Белград. Според аналитичарите, најнеизвесна борба ќе се води за власта во градот Белград, каде СНС, ќе мора да коалицира со СПС на Дачиќ, со што би имале можност за освојување на градска власт, од што ќе зависи и коалицирањето на парламентарно ниво.