INFOMAX.MK

Антикорупциската комисија донела одлука да се стават вон сила одлуките на Судскиот совет и Советот на јавни обвинители за назначување на четворица нови членови во управниот одбор на Академијата за судии и јавни обвинители. ДКСК утврдила дека овие одлуки се во спротивност со Законот за спречување на корупција и судир на интереси, како и со Законот за избор на членови на Академијата.

Според Антикорупциска, истите лица кои веќе се дел од овие советски тела не можат да бидат и членови на управниот одбор, бидејќи тоа создава недозволена акумулација на функции и потенцијален судир на интереси, што може да влијае на процесите на прием и избор на кандидати за судии и јавни обвинители.

Како што изјави Билјана Каракашова Шулев, членка на ДКСК: „Во конкретниот случај освен што постои недозволена акумулација на функции кај едно исто лице, таквата состојба претставува и постоење на континуиран, потенцијален судир на интереси“.

Предходно, Судскиот совет номинирал Антоанета Димовска и Ханиф Зендели за членови на управниот одбор, додека Советот на јавни обвинители ја номинирал Душица Димитриевска и уште еден член од својот состав. Властите претходно укажаа дека овие одлуки претставуваат кршење на законот и дека водат до поставување на луѓе блиски до опозицијата во Академијата. Со забелешки се јавија и од невладината Коалиција за правично судење, кои посочуваат дека назначувањето на лица од истите тела во Академијата создава ризик од корупција и судир на интереси.