Еден Стpaтег, една Струмичка Барбика и немopaлна Алтернатива

Колумната е кратка приказна за селските и примитивни трикови на политичката авангарда на власт во Македонија. Добро, приказна е и за нејзините модерни и урбани политички партии.

Претпоставувам, погодувате. Кратко, многу кратко(само морално и психолошки) ќе ги дефинирам Али Ахмети, како ненадминат стратег во политиката, Зоран Заев, доскорешен политички Рамбо, а сега веќе само Струмичка Барбика и Алтернатива на Албанците, политичка партија, која продавајќи морал стана неморална и непринципиелна – сите актери во психополитичкиот парк “Северна Република Македонија“.

Зошто го правам ова?

Најискрено, чувствувам морална потреба да го искажам својот револт и неспокој. А најмногу својата резигнација, за неспорниот факт дека Македонија, мојата држава, државата во која живеам, е втурната во трагикомична и гротескна ситуација.

Напред посочените заедно ја потврдија девизата: Тежок е првиот преседан, потоа се е техника. Ете, токму преку овој принцип, девиза или метод, забеганите политички елити од власта, и една митарена елита од опозицијата, деновиве ја покажаа и одиграа сета своја неразумна, неумна и непринципиелна политичка улога во македонската демократија.

Каква е таа ситуација, какви се луѓето кои се нејзини актери?

Најпрвин добивме премиер во оставка. Тој, наместо брзо и неодложно да ја реализира оставката, повеќе од еден месец игра мајтап со сите нас, со демократијата и со Македонија. Така премиерот не заминува, не дозволува друг привремено да ја обавува неговата функција, и бара, бара и упорно бара ново мнозинство(??? – па ако нема мнозинство како може и понатаму да се однесува дека е власт???), бидејќи во Собранието има само 59 пратеници, плус еден киднапиран Европеец. Одозгора на тога, и преговара за нова влада, за нови министри, нивни заменици и директори на државни институции. А Уставот, во кој е запишано, кога премиерот дава оставка, целата влада е во оставка, кој го шиша. Епа затоа што во нашата држава никој и ништо не шиша, ни се случува човек кој си заминува, да ни ја решава иднината и судбината во неа. И така, во негов препознатлив стил, ги нуди министерските, заменичките и директорските места, како да му се дедовина и негова прчија.

Ваквото негово однесување е резултат на еден тензичен телефонски разговор со Стратегот(Али Ахмети – кој е вториот, а всушност првиот актер), после што го снема во јавноста, а кога по десетина дена се појави, ни соопшти дека во органите на неговата СДСМ внимателно се разгледувала и анализирала неговата оставка. Човек не знае дали сето ова е стварност или привид на стварноста. Секако, тука е и третиот актер, толку очекуваната и посакувана Алтернатива, на-врат-на-нос измитарена од партија “трагач по ново мнозинство“ во “партија ново владино мнозинство“, т.е. партија-владетелка.

Повторно одлучувачки беше еден тензичен телефонски разговор(се сеќавате како и во 2017-тата), ескапизмот на фалшпилерот(премиерот блефер и измамник) и еден пратеник во илегала или грабнат(значи двојно бегство од јавноста) и митарењето на Алтернативците, кои од “непоколебливи“ иницијатори за ново мнозинство(на опозицијата) и рушење на владата, се трансформираа во градители на новото владино мнозинство, кое беше замрзнато на котата 59+1. Еклатантен пример кога еден Стратег, еден премиер во оставка – фалсшпилер, еден пратеник-побегуља и една за-власт-митарена партија, по секоја цена, брутално и бескруполозно ја втурнуваат македонската демократија во канџите на племенскиот трибализам и во оковите на партијата и коалицијата, најконкретно во политичкиот картел кој по никоја цена не ја испушта власта од свои раце.
Така ти е кога Стратегот ќе обави тензичен телефонски разговор и Политичкиот Рамбо ќе го стори Струмичка Барбика, а Алтернативата ќе го изгуби компасот, поради добивање(море и барање) на понуда која не се одбива.

Ете, наместо во политиката и демократијата во Македонија да надвладее духот на Волтер и Кант, ни се случува политички и морален лупинг(од “салто морале“ до “салто мортале“) и стануваме Див Исток со кого владеат десперадоси од типот и ликот на Били Д Кид, Вајат Ерп и Каламити Џејн. Чинам повеќе од јасно е: Со Ван Дам политичка техника, премиер од Рамбо вампири во Барбика, пратеник преку ескапизам(бекство) станува непоправлив принципиелен Европеец со вредносен систем на високо ниво, а Алтернатива митари во партиски Фауст(човечка жед за власт во сојуз со политичкиот пекол и изневерување на моралните принципи). Сите до еден “демократи од 24 карати“, кои создадоа нов тип демократија – ескапистичка, чија основна карактеристика е склоност кон барање засолниште од реалноста во фантазирање и илузии. Попластично кажано, политички проститутки во обид да направат здружение на часни сестри.

Епилог – сите се по латински Фаустос(среќен) – и Стратегот, и Барбика и Алтернатива. А нивните души? Знаат ли каде им се? Молам без Ѓаволски заврзлами за крај.

Share on Facebook

Tweet

Follow us

Save