За кого се носело запленетото нелегално оружје наменето за Македонија?

Значителна количина оружје и муниција е запленета на граничниот премин Капитан Андреево, но случајот отвора сериозни прашања за тоа за кого била наменета пратката и со каква цел.

Службеници од Генералната дирекција за борба против организиран криминал (ГДБОК) и Царинската агенција на Бугарија заплениле три пушки, 20 гасни пиштоли и 5.750 куршуми за време на заедничка акција за борба против нелегално оружје, опасни и радиоактивни материјали, соопшти Министерството за внатрешни работи на Бугарија.

Камионот бил селектиран за инспекција и рендгенска контрола на 18 декември 2025 година. Возачот, државјанин на Македонија, доставил документи за стоката што ја превезувал, го паркирал возилото пред рендген-зоната, но потоа избегал од граничниот премин без овластување, пред да бидат завршени контролните мерки, што веднаш предизвикало сомнеж кај надлежните служби.

Една недела подоцна, на 24 декември, сопственикот на транспортната компанија се појавил на граничниот премин пред бугарските власти. Во негово присуство била извршена детална инспекција и физичка контрола на камионот, при што службениците пронашле и заплениле шест картонски кутии со оружје и муниција, скриени во товарниот простор.

За шверцуваните пиштоли и чаури пронајдени кај возачот е составен записник согласно Царинскиот закон, додека за нелегалниот транспорт на пушките, под надзор на Окружното обвинителство во Хасково, е покрената предистражна постапка.

Иако е утврдено дека нелегалното оружје било наменето за трговија на територијата на Република Северна Македонија, идентитетот на крајните примачи сè уште не е познат. Останува нејасно дали оружјето било наменето за организирани криминални групи, нелегални пазари или за поединци.

Токму овие неодговорени прашања го прават случајот особено загрижувачки и ја нагласуваат потребата од засилена регионална соработка во борбата против прекуграничниот шверц со оружје. Истражните органи во Бугарија најавуваат продолжување на истрагата со цел да се открие кој стои зад пратката и за каква намена била планирана.

Share on Facebook

Tweet

Follow us

Save