Зеленски: Подготвени се неколку нацрт-документи за завршување на војната со Русија

Украинскиот претседател Володимир Зеленски денес изјави дека се подготвени неколку нацрт-документи за завршување на војната со Русија, вклучително и оние за безбедносни гаранции за Киев, по разговорите што ги водеа украинските претставници во Мајами со нивните американски колеги.

Тој рече дека членовите на украинската делегација, Рустем Умеров и Андриј Хнатов, поднеле детален извештај по состаноците со американскиот тим.

„Тие продуктивно соработуваа со претставниците на претседателот Трамп, а сега се подготвени неколку нацрт-документи. Конкретно, тие вклучуваат документи за безбедносни гаранции за Украина, за закрепнување и за основната рамка за завршување на оваа војна“, напиша Зеленски на X.

Зеленски додаде дека е „исто така благодарен на европските партнери за нивната поддршка и координација“ и дека „се радува на продолжувањето на дијалогот со Соединетите Американски Држави“.

Според него, потребно е дипломатијата секогаш да оди „рака под рака“ со притисокот врз Русија и поддршката за Украина.

Американскиот претседател Доналд Трамп претходно изјави дека мировните преговори меѓу Украина и Русија се во тек и напредуваат „нормално“, но дека постои голема „омраза“ меѓу рускиот и украинскиот претседател Владимир Путин и Володимир Зеленски.

„Постои голема омраза меѓу овие двајца лидери, Путин и Зеленски. Разговараме. Сè оди добро. Војната мора да престане“, изјави Трамп за новинарите во неговиот имот Мар-а-Лаго во Флорида, според соопштението на Јутјуб каналот на Белата куќа.

Во Мајами, од 19 до 21 декември, украинските и американските делегации одржаа серија состаноци за мировниот план и разговараа со претставници на Русија, а досега не се најавени нови состаноци.

Share on Facebook

Tweet

Follow us

Save