Зеленски: Се’ додека трае војната, потребна ни е помош

Светската помош за Украина би била доволна кога војната ќе заврши, но додека тоа не се случи нешто секогаш ќе недостасува, рече украинскиот претседател, Володимир Зеленски.

„Дали е доволна помошта од светот за Украина? Ќе ви го кажам ова: ако војната беше завршена, ќе беше доволно. Се додека трае војната, ништо не може да биде доволно. Тоа значи дека секогаш нешто недостасува. Помошта не е само оружје, тоа е и информативна поддршка и хуманитарна помош“, изјави украинскиот претседател во интервју за Глобо, а пренесува Укринформ.

Според него, по завршувањето на војната ќе биде потребна помош за обнова на Украина, медицинска и психолошка рехабилитација на луѓето, политичка помош.

„Многу е важно Украина да победи. Важно е населението на Украина да преживее, а Украина да ги брани глобалните и европските вредности“, нагласи Зеленски.

Тој смета дека се додека луѓето во светот се обединети, постои шанса да се воспостави мир и да се избегне Трета светска војна.

Одговарајќи на прашањето зошто темата за руската војна против Украина е толку често поврзана со САД, Зеленски нагласи дека Вашингтон и дава најголема помош на Украина.

Како што беше претходно објавено, американското Министерство за одбрана на 25 јули објави дополнителен пакет воена помош за Украина, кој предвидува итна испорака на оружје и опрема од залихите на Пентагон, вклучувајќи ракети за Patriot, NASAMS, HIMARS и други системи.

Share on Facebook

Tweet

Follow us

Save