Калајџиев за иницијативата на ВМРО-ДПМНЕ за Судскиот совет: Откако дојдоа на власт безобзирно форсираат свои луѓе, би ги поддржал да имавме гаранции дека ќе изберат независни авторитети

Пратениците на ВМРО-ДПМНЕ до Собранието ќе поднесат иницијатива за разрешување на членовите на Судскиот совет, соопшти на Фејсбук премиерот Христијан Мицкоски.

– На државата и граѓаните им е потребна правда, а правда може да се добие со длабоки реформи и сериозни промени наспроти досегашните пракси на злоупотреби кои имаат пуштено длабоки корени во системот.

Македониjа мора да се бори против своето корумпирано мочуриште кое jа држи заробена и заложник и е причина за неjзино пропаѓање и разочарување кај многу од граѓаните. Затоа пратениците на ВМРО-ДПМНЕ ќе поднесат иницијатива за разрешување на членовите на Судскиот совет, кој според мое длабоко убедување е дел од системот кој останува главното упориште на корупцијата, неправдите и разочарувањата.

Македониjа мора да победи! – напиша Мицкоски.

Професорот Гордан Калајџиев би поддржал промени во Судскиот совет, доколку има гаранции дека на местото на сегашните членови на советот би биле поставени независни авторитети. Во краткиот коментар за Инфомакс, професорот Калајџиев вели дека откако новата гарнитура е на власт безобзирно форсираат свои луѓе.

– Да имавме гаранции дека на нивно место би поставиле независни авторитети би ги поддржал. За жал, откако дојдоа на власт безобзирно форсираат свои луѓе! – истакна Калајџиев коментирајќи ја иницијативата на ВМРО-ДПМНЕ.

Идејата на Мицкоски ја коментираше и претседателот на Судскиот совет, Александар Калајџиев кој истакна:

„Во повеќе наврати сум дал изјави, сум дал мислења во поглед на постапка за разрешување членови на Советот. Единствено место каде што тоа е предвидено е во Законот за Судскиот совет. Иницијативи може да се поднесуваат до Собранието, секој има право да поднесува иницијативи. Сите во оваа држава работиме во согласност со законите и Уставот. Немам причина да се сомневам дека и Собранието и Владата работат во согласност со тие принципи“, рече претседателот на Судскиот совет, Камбовски.

Сѐ додека е во сила актуелниот Закон за Судскиот совет, Камбовски смета дека треба да се почитува, а за наоѓање излез од сегашната состојба вели дека е подготвен за соработка со претставници и на двете власти во земјата – законодавната и извршната.

„Очигледно постои некое незадоволство кон членовите на Судскиот совет, меѓутоа во оваа држава секоја власт мора да дејствува во согласност со законите и Уставот“, вели Камбовски.

Поранешниот министер за правда, Кренар Лога, истакна дека од оваа идеја на Мицкоски државата и правосудството ќе имаат далекусежни последици.

Со иницијативата за разрешување на членовите на Судскиот совет, Македонија отворено се спротивставува на Извештајот од Оценската Мисија, испратен во Македонија од ЕУ во 2023 година, кој е исто така инкорпориран во Развојната секторска стратегија за правосудството 2024 – 2028 год.

Сето ова е исто така дел од Реформската агенда на ЕУ за Западен Балкан, во рамките на која Северна Македонија добива средства и грантови во вредност од 750 милиони евра, објасни во објава на Фејсбук поранешниот министер за правда, Кренар Лога.

– Губењето на средствата од агендата за реформи во рамките на „Планот за раст“ за Северна Македонија би имало сериозни последици:

1. Забавување на реформите – Овој план е поврзан со структурните реформи барани од ЕУ. Без овие средства, реформите може да се одложат или останат нецелосни.

2. Помалку инвестиции – Средствата од ЕУ помагаат во подобрување на инфраструктурата, образованието, јавната администрација и економијата. Нивното губење значи помалку инвестиции во клучните сектори.

3. Намалена доверба – Северна Македонија би испратила негативен сигнал до меѓународните партнери, нарушувајќи го имиџот како земја подготвена за европска интеграција.

4. Зголемување на финансискиот товар – Без помошта од ЕУ, владата ќе мора да обезбеди средства од други извори, како задолжување, што би довело до зголемување на јавниот долг.

5. Одложување на европската интеграција – ЕУ може да го протолкува ова како недостаток на сериозност во спроведувањето на реформите, што негативно ќе влијае на процесот на интеграција.

Ако Северна Македонија не ги исполни потребните услови, средствата може да бидат пренасочени кон други земји во регионот. – пишува Лога на Фејсбук.

Согласно Законот за Судски совет, Советот е составен од 15 члена, од кои:

– По функција членови на Советот се претседателот на Врховниот суд на Република Македонија и министерот за правда,

– Осум члена на Советот ги избираат судиите од своите редови. Тројца од избраните членови се припадници на заедниците кои не се мнозинство во Република Македонија, при што ќе се запази соодветната и правична застапеност на граѓаните кои припаѓаат на сите заедници.

– Тројца членови на Советот ги избира Собранието на Република Македонија со мнозинство гласови од вкупниот број пратеници, при што мора да има мнозинство гласови од вкупниот број пратеници кои припаѓаат на заедниците кои не се мнозинство во Република Македонија

– двајца членови на Советот предлага претседателот на Република Македонија, а изборот го врши Собранието на Република Македонија, од кои еден е припадник на заедниците кои не се мнозинство во Република Македонија.

Членовите на Советот по функција учествуваат во работата на Советот без право на глас. Членовите на Советот по функција не учествуваат во работата на седниците на Советот на кои се расправа и одлучува за поведена постапка за утврдување на одговорност, избор или разрешување на судија или претседател на суд.

Избраните членови на Советот од редот на судиите имаат мандат од шест години со право на уште еден избор по истекот на најмалку шест години од престанокот на претходниот мандат во Судскиот совет. Членовите на Советот избрани од страна на Собранието на Република Македонија имаат мандат од шест години со право на уште еден избор.
На претседател на Врховниот суд на Република Македонија и на министер за правда со престанок на функцијата им престанува и мандатот во Советот. Мандатот на член кој е избран на дополнителни избори, поради предвремен престанок на мандатот на член на Советот на чие место е избран, трае шест години.

На огласот за избор на член на Советот од редот на судиите може да се јави секој судија кој во моментот на објавување на огласот врши судиска функција и кој ги исполнува следниве услови:
-да има најмалку шест години судиски стаж,
-да има позитивна оцена во работењето во вршењето на судиската функција,
-да не му е изречена со правосилна одлука дисциплинска мерка намалување на плата во висина од 15% до 30% од месечната плата која трае во моментот на објавување на огласот.

На огласот за избор на член на Совет по предлог на Собранието на Република Македонија може да се јави секое лице кое во моментот на објавувањето на огласот ги исполнува следниве услови:
-да е државјанин на Република Македонија,
-дипломиран правник со најмалку 15 години работно искуство во правната професија со положен правосуден испит и кое во вршењето на правната професија се истакнало со научна или професионална работа или со свое јавно делување,
-да не е осуден со правосилна судска пресуда за кривично дело злоупотреба на службена должност и овластување во вршење на функцијата или друго кривично дело на безусловна казна затвор од најмалку шест месеци што го прави недостоен за да ја врши функцијата член на Советот и
-да ужива углед и да поседува интегритет за вршење на функцијата член на Совет.

За член на Советот по предлог на претседателот на Република Македонија, Собранието на Република Македонија може да избере лице кое во моментот на изборот ги исполнува следниве услови:
-да е државјанин на Република Македонија,
-дипломиран правник со најмалку 15 години работно искуство во правната професија со положен правосуден испит и кое во вршењето на правната професија се истакнало со научна или професионална работа или со свое јавно делување,
-да не е осуден со правосилна судска пресуда за кривично дело злоупотреба на службена должност и овластување во вршење на функцијата или друго кривично дело на безусловна казна затвор од најмалку шест месеци што го прави недостоен за да ја врши функцијата член на Советот и
-да ужива углед и да поседува интегритет за вршење на функцијата член на Совет.

Надлежности на Судскиот совет

Советот е надлежен да:
-ги избира и разрешува судиите,
-ги избира и разрешува претседателите на судовите,
-утврдува престанок на судиската функција,
-избира и разрешува судии поротници,
-ја следи и оценува работата на судиите,
-одлучува за дисциплинска одговорност на член на Советот,
-одлучува за утврдување на одговорност на судија и претседател на суд,
-одлучува за одземање на имунитет на судија,
-одлучува по барање за одобрување на притвор на судија,
-предлага двајца судии на Уставниот суд на Република Македонија од редот на судиите,
-го разгледува годишниот извештај на Врховниот суд на Република Македонија за утврдените начелни ставови и начелни правни мислења по прашања од значење за обезбедување на единство во примена на законите,
-одлучува за времено оддалечување на судија од вршење на судиска функција и член на Совет од вршење на функцијата член на Совет,
-го утврдува бројот на потребните судиски места по судови,
-ги разгледува и оценува тримесечните и годишните извештаи за работа на судовите и истите јавно ги објавува на својата веб страница,
-постапува по претставки и поплаки на граѓаните и правните лица за работата на судиите, претседателите на судовите и судовите,
-се грижи за угледот на судиите и довербата на граѓаните кон судството,
-поднесува годишен извештај за работата,
-донесе деловник и други општи акти со кои ги уредува работите од својата надлежност,
-утврдува ориентационен број на предмети што треба да ги реши судијата месечно и
-врши и други работи утврдени со закон.

Share on Facebook

Tweet

Follow us

Save