Ковачевски: Граѓаните и компаниите ќе можат да поставуваат фотоволтаици по најповолни услови

Граѓаните и деловната заедница ќе може да постават најбрзо и по најповолни услови фотонапонски електроцентрали за производство на струја. Стапија на сила измените на Законот за градење како дел од низата мерки за поддршка во услови на најголемата светска енергетска криза.

На овој начин се поедноставува процедурата за поставување на фотонапонски електроцентрали на објектите и тоа до 6 киловати за домаќинствата и до 40 киловати за компаниите.

Клучно е што процедурата е без административни постапки и не е потребно издавање на одобрение/решение за градење од локалната самоуправа.

Инвеститорите се сега должни само да ја известат Општината и да ги достават потребните документи. За правни лица ќе биде потребен извод од Централен регистар, а за физички лица копија од лична карта, потоа имотен лист за објектот на кој се поставува и основен проект. Контролата дали се поставени фотоволтации како што е предвидено со проектот ќе ја вршат општинските инспектори.

Поточно, граѓаните треба да достават известување за поставување на фотонапонска електроцентрала кон кое ќе приложат:

–          копија од лична карта

–          имотен лист за објектот на кој се предвидува да се постави фотонапонската електроцентрала, со право на сопственост на инвеститорот

–          доколку објектот не е во сопственост на инвеститорот, се доставува договор или согласност од сопственикот на објектот

–          основен проект за фотонапонска електроцентрала до 6 киловати за домаќинствата, односно до 40 киловати за компаниите.

Со измените се предвидува посебна постапка за поставување на фотонапонски електроцентрали на објекти, без издавање на решение за поставување, од страна на потрошувачи-производители кои произведената електрична енергија ја користат за сопствена потрошувачка, а вишокот на произведената енергија го предаваат во електродистрибутивна мрежа.

Владата работи во интерес на граѓаните и на стопанството, за ублажување на последиците од најголемата светска енергетска криза.

Покрај приоритетното обезбедување со електрична енергија и храна, се инвестира во проекти за зголемување на енергетската независност, развој на зелена економија и подобар животен стандард. Од почетокот на кризата, со цел забавување на прелевањето на инфлаторните притисоци, беа преземени мерки во износ од 400 милиони евра, кои потоа беа надополнети со мерки предвидени во ребалансот на Буџетот и како трет сет мерки е најновиот пакет од 360 милиони евра поддршка за граѓаните и за стопанството.

И премиерто Ковачевски на Фејсбук напиша дека граѓаните и бизнис секторот се приоритет на Владата што ја предводи тој.

– Измените на Законот за градење стапуваат на сила! Отсега, сите граѓани и компании, најбрзо и по најповолни услови, со поедноставување на процедурите, без издавање на одобрение односно решение за градење и без дополнителни административни постапки, ќе може да постават фотонапонски електроцентрали за производство на струја.

Посветено работиме на ублажување на последиците од енергетската криза. Инвестираме во проекти за зголемување на енергетската независност, развој на зелена економија и подобар животен стандард, напиша Ковачевски.

Share on Facebook

Tweet

Follow us

Save