INFOMAX.MK

Косовската царина потврди дека забраната што ја воведе Владата на Косово за стоки со потекло од Србија се уште важи, пренесува Газета Експрес.
„Немаме влез на српска стока во Косово“, изјави портпаролот на Царината Адриатик Ставиљеци за Експрес.

По воведувањето на оваа забрана се очекуваше поскапување бидејќи од Србија се увезуваат голем број производи, но од Министерството за индустрија, претприемништво и трговија соопштија дека тоа не се случило.

Од ова министерство велат дека инспекторите не забележале промена на цените што на било кој начин би се поврзало со запирање на српска стока на премините.

Поради одлуката на косовската Влада камионите со српски регистарски таблички не можеа да влезат во Косово, без разлика на потеклото на производите што ги превезуваа, а ова беше мерка што ја воведе Приштина откако српската полиција уапси тројца косовски полицајци. Тогаш таа одлука беше сменета така што забраната се однесува за влез на Косово само за камиони кои превезуваат стока со потекло од Србија.