Курти: Ако Србија реши да нè нападне, нашиот отпор ќе биде успешен – Сметаме на САД и НАТО

Косовскиот премиер Албин Курти изјави дека не се плаши од воена интервенција на Србија на Косово, иако не ја исклучува таа можност и додаде дека во тој случај „отпорот би бил успешен“ и дека смета на НАТО, САД и ЕУ. За разлика од Косово, рече Курти за N1 БиХ, Србија „ќе смета на Русија и Кина“.
Курти рече дека многу српски генерали и функционери би сакале Косово да биде нападнато, но не смеат.

„Тоа не значи дека тие не се надеваат на нови околности во иднина кога би можеле да нападнат. Србија знае дека ситуацијата не е како пред 20 години. Нашиот отпор би бил успешен во тој случај“, рече Курти.

Курти рече дека неколку месеци пред почетокот на конфликтот во Украина, во септември 2021 година, министерот за одбрана на Србија заедно со рускиот амбасадор дошле на границата на Косово каде ги посетиле српските воени сили.

„Во тоа време бевме во редовен контакт со НАТО и КФОР бидејќи Србија сакаше да испрати порака дека заедно со Русија може повторно да го окупира Косово. Во последните месеци тие добија оружје од Кина. Значи Србија смета на Русија и Кина, а кога тие сметаат на нив, тогаш сметаме и на НАТО, САД и ЕУ“, рече Курти.

Тој повтори дека на Србија „нема да ѝ се дозволи“ да започне офанзива, иако тоа апсолутно не го исклучува бидејќи, како што тврди, Србија „има 48 бази околу границата“.

„Една од причините зошто Србија вели дека нема да го признае Косово е затоа што сака да има што е можно подобри односи со Русија и Кина. Кога Србија го вели ова, не ни го кажува нас, туку Русија затоа што сака да ѝ каже на Москва дека ќе продолжи да биде нејзин гувернер иако добива пари од ЕУ, заклучи Курти.

Share on Facebook

Tweet

Follow us

Save