INFOMAX.MK

Алкалоид загуби од Војводина со 26-31, главно поради своите грешки во нападот и промашените зицери, во првото коло од Европската лига. Токму тоа го нагласи и тренерот Кире Лазаров како главен фактор за поразот.

Тој кажа дека Војводина заслужено победи на овој меч бидејќи беше подобар ривал, а Алкалоид не ги искористи своите шанси.

„Зборував и вчера во најавата дека Војводина е подобар тим. Тие денеска заслужија да победат, беа подобри и сакам да кажам дека се десет пати едноподруго шампиони на Србија, а тоа значи многу. Ќе бидат подобри и подобри. Не сум задоволен од мојот тим, бидејќи ако утнете пет пенали во еден сериозен меч, не знам што повеќе да кажам. Промашивме вкупно 21 шут и пет пенали, а со тоа е невозможна мисија да се победи против тим како Војводина“, изјави Лазаров на прес-конференцијата.

Тој го истакна нападот како причина за поразот, имајќи предвид дека неговиот тим реализира 26 од 45 шута, во нив пет од девет пенали. Нагласи дека реализацијата е проблем кој се провлекува веќе подолго време и во домашното првенство.

„Мислам дека нашиот проблем денеска не беше во нашата одбрана, туку во нападот. Тешко беше да се надигра нивната одбрана, квалитетна, цврста, борбена, а потоа и брзи и лесни голови од контра. Имаше и добри работи, штом креираме толку седмерци значи има добро, но не успеавме да ги реализираме. Имавме и доста зицери. Меѓутоа не е само денеска, вака е и во македонското првенство, само што квалитетот овде е повисок од македонското првенство. Имаме проблем со реализацијата и мора да поработиме на тоа. Денеска беше огнено крштевање за некои играчи во Европа и можам да разберам, но во македонското првенство не можам да го разберам. И минатата сезона имавме вакви наптревари со лоша реализација со посилни противници, кои ги губевме. Е сега дали е психолошки проблем, дали е тренерска грешка… не знам. Важно ни фалеше реализацијата за да бидеме покомпетитини со големи екипи“, рече Лазаров.

Извор: sport1.mk