Макрон за Би-Би-Си: Израел да престане да убива деца и жени

Израел мора да престане да убива бебиња и жени во Газа, изјави францускиот претседател Емануел Макрон за Би-Би-Си.

Во ексклузивно интервју во Елисејската палата, тој рече дека „нема оправдување“ за бомбардирањето, велејќи дека прекинот на огнот ќе биде од корист за Израел.

„Иако го признаваме правото на Израел да се заштити, ги повикуваме да го запрат ова бомбардирање на Газа“, рече тој.

Но, исто така нагласи дека Франција „јасно ги осудува“ „терористичките“ акции на Хамас.

Франција – како Израел, САД, Велика Британија и другите западни земји – го сметаат Хамас за терористичка организација.

Вооружени напаѓачи на Хамас убија околу 1.200 луѓе и зедоа 240 други како заложници во нивниот невиден прекуграничен напад на 7 октомври.

„Ја делиме болката на Израел. Ја делиме нивната подготвеност да се ослободат од тероризмот. Во Франција знаеме што значи тероризам, но нема оправдување за тековните бомбардирања на цивили во Газа“ наведе Макрон.

„За сите нас е исклучително важно поради нашите принципи, затоа што сме демократија. Важно е на среден и долг рок и за безбедноста на самиот Израел, да признаеме дека сите животи се важни“, додаде тој.

Запрашан дали сака другите лидери – вклучувајќи ги САД и Велика Британија – да се приклучат на неговите повици за прекин на огнот, тој одговори: „Се надевам дека ќе го сторат тоа“.