Милер: Германија е на добар пат, но нема да може да ја исполни целта за полнење на складиштата со гас

Германија повторно е на пат кон „пристојни“ нивоа на полнење на складиштата со гас, но малку е веројатно дека ќе ја постигне зацртаната цел за нивно полнење до 1 ноември, изјави денеска шефот на државниот регулатор Бундеснетцагентур, Клаус Милер.

Тој на Твитер објави дека заклучно со 23 јули, вкупното ниво на исполнетост била 65,91 отсто, а сегашната цел е до 1 септември магацинот да достигне 75 отсто исполнетост.

Минатата недела, германското Министерство за економија ја зголеми целта за полнење на складиштата, откако гасоводот Северен поток 1 продолжи со работа по 10 дена одржување, иако со капацитет од само 40 проценти.

Новите цели се 75 отсто пополнетост на складиштата до 1 септември, 85 отсто до 1 октомври и 95 отсто до 1 ноември, објави Министерството, истовремено воведувајќи мерки за заштеда на енергија, вклучително и забрана за греење базени во приватни домови.

Милер, од друга страна, денеска рече дека не верува дека е можно да се достигне целниот опсег меѓу 90 и 95 отсто од капацитетот за складирање до 1 ноември, објави Велт, цитирајќи учесници на состанокот за гас организиран од покраината Баден-Виртемберг.

На сегашното ниво на испорака на „Северен поток 1“, нивоата на складирање во најдобар случај би можеле да достигнат максимум од 80 до 85 проценти капацитет, пишува „Велт“.

Share on Facebook

Tweet

Follow us

Save