МО: Шугата не е добиена во касарната во Велес, регистрирани четири заразени лица

Министерството за одбрана (МО) ги демантира информациите дека заразната болест шуга (scabies) потекнува од касарната „Алексо Демниевски Бауман“ во Велес. Од министерството апелираат да не се злоупотребуваат поединечни случаи за манипулација со јавноста и нарушување на угледот на Армијата.

Досега се регистрирани вкупно четири лица кај кои е дијагностицирана болеста и на истите веќе им е пропишана соодветна медицинска терапија, Воено-медицинскиот центар (ВМЦ) веднаш ги спроведе следните чекори:

Епидемиолошки надзор: Извршен е стручен надзор и сите војници кои биле во контакт со заразените се испратени на превентивни прегледи.

Целосна дезинфекција: Во текот на викендот е извршена комплетна замена на постелнината и дезинфекција на сите спални соби, душеци, перници и ќебиња во велешката касарна.

Едукација: Војниците се детално информирани за симптомите и упатени се веднаш да пријават каква било кожна промена кај воените лекари.

Од Министерството појаснуваат дека пред приемот на оваа класа професионални војници, просториите биле комплетно дезинфицирани и опремени со чиста постелнина. Тие потенцираат дека шугата се пренесува исклучиво преку директен контакт со заразено лице или негови предмети, што укажува на тоа дека изворот е надвор од касарната.

„Во оваа касарна, како и во центрите Криволак и Пепелиште, годишно престојуваат голем број припадници на Армијата и на сојузничките војски, а досега ваков случај не е регистриран“.

За периодот 2026–2027 година, предвидени се 41.300.000 денари за реконструкција и санација на армиските објекти. Овие средства се наменети за подигнување на стандардите за работа и престој на војниците, вклучувајќи градежно-занатски работи и подобрување на вкупната хигиена и безбедност во центрите за обука.

Share on Facebook

Tweet

Follow us

Save