Нетанјаху: Израел има право да се брани од можен нуклеарен напад од Иран

Израелскиот премиер Бенјамин Нетанјаху го повтори правото на Израел да се брани од можен нуклеарен напад од Иран за време на состанокот на владата денеска во Ерусалим, јави ДПА.

Нетанјаху ова го изјави како одговор на коментарот на шефот на Меѓународната агенција за атомска енергија (МААЕ), Рафаел Гроси, откако МААЕ и Иран вчера постигнаа договор за инспекции на иранските нуклеарни постројки.

„Генералниот директор на Меѓународната агенција за атомска енергија Рафаел Гроси штотуку изјави во Техеран дека израелскиот напад врз иранските нуклеарни постројки е против законот“, рече Нетанјаху.

„Рафаел Гроси е пристојна личност која даде непристоен коментар“, додаде тој. „Против кој закон? Дали е дозволено Иран, кој отворено повикува на наше уништување, да ги добие средствата за наше истребување? Дали ни е забрането да се браниме? Очигледно не ни е, напротив ни е дозволено да се браниме“, рече премиерот.

„Го велам ова бидејќи ништо нема да не спречи да ја браниме нашата земја и да ги спречиме нашите непријатели да ја уништат еврејската држава“, рече Нетанјаху.

Вчера МААЕ и Организацијата за атомска енергија на Иран (МААЕ) објавија дека ќе им биде дозволено на експертите од нуклеарното набљудување на ОН да вршат поблиски инспекции на иранските нуклеарни постројки.

„Камерите на МААЕ, исто така, ќе бидат вратени во употреба откако тие и другата опрема за надзор беа демонтирани минатата година“, рече Гроси.

Откако САД се повлекоа од нуклеарниот договор за ограничување на збогатувањето ураниум, Иран го збогати ураниумот до ниво на чистота од 60 проценти, што ја загрижува меѓународната заедница додека се приближува кон можноста да изгради нуклеарно оружје.

Израел е убеден дека Иран работи на развој на нуклеарно оружје и го гледа како закана за своето постоење.

Share on Facebook

Tweet

Follow us

Save