Претседателот на Азербејџан не сака да разговара со лидерите на ЕУ

Илхам Алиев, претседателот на Азербејџан ѝ се налутил на француската влада и нема да патува на собирот под покровителство на ЕУ и на средбата со премиерот на Ерменија, кој потврдил дека сепак ќе патува.

Алиев размислувал за учество на утрешната петпартиска средба во Гранада, Шпанија со лидерите на Франција, Германија, Ерменија и претседателот на Европскиот совет, Шарл Мишел.

Петмината треба да разговараат за иднината на регионот Нагорно-Карабах, над кој Азербејџан ја презеде целосната контрола во молскавична воена операција на 19 септември, и да ги обноват мировните преговори меѓу Азербејџан и Ерменија.

Повикувајќи се на неименувани извори, азербејџанската новинска агенција АПА јавува дека Алиев нема да одговори, што неговиот кабинет официјално не го потврдил. Според АПА, Алиев сакал Турција, сојузник на Азербејџан, да биде на состанокот, на што се спротивставиле Франција и Германија.

Меѓу потенцијалните учесници се почувствувала „антиазербејџанска атмосфера“, вели изворот.

Баку особено ја обвинува Франција дека зазела „проерменска позиција“ и одлучила да го снабди Ереван со воена опрема. Француската министерка за надворешни работи Катрин Колона разговарала вчера во Ереван со Пашинјан, што е прва посета на западен министер на регионот откако Азербејџан го презеде Карабах.

Азербејџанското Министерство за надворешни работи ги осуди коментарите на министерката Колона, која изразила поддршка за територијалниот интегритет на Ерменија.

Азербејџан во иднина нема да учествува на никакви разговори во кои ќе биде вклучена Франција, но е отворен за трилатерални средби Баку-Ереван-Европска унија, пренесува АПА.

Ерменскиот премиер потврди дека ќе отпатува за Шпанија, која во моментов претседава со Европската унија, без оглед на повлекувањето на Алиев, соопшти денеска ерменската влада.

Руската новинска агенција Интерфакс го цитираше Пашинјан дека би зажалил што ја пропуштил можноста да разговара со Алиев. Од друга страна, ерменскиот премиер е изложен на силни критики и протести од жителите кои бараат негова оставка, обвинувајќи го за загубата на Карабах и егзодусот на етничките Ерменци од тој регион.

Пашинјан рече дека е подготвен веднаш да поднесе оставка доколку тоа би ја нормализирало ситуацијата во земјата, но според неговото верување, оставката само ќе ја влоши ситуацијата, пренесе државната агенција „Арменпрес“.

Од падот на Карабах, повеќе од 100.000 етнички Ерменци го напуштија Карабах и побараа засолниште во Ерменија, земја со само 2,8 милиони жители.

Share on Facebook

Tweet

Follow us

Save