Протестите во Иран продолжуваат, има мртви и ранети, илјадници се уапсени

Насилни судири меѓу антивладините демонстранти и безбедносните сили избувнаа вчера на неколку локации низ Иран, додека немирите поттикнати од тешката економска криза продолжуваат веќе 11-ти ден. Полуофицијалната новинска агенција Фарс, блиска до Револуционерната гарда, објави дека вооружени лица убиле двајца полицајци во југозападниот град Лордеган, јавува Би-Би-Си .

На социјалните мрежи циркулираат видеа на кои се гледаат напнати конфронтации и пукања. Снимките од неколку области покажуваат како безбедносните сили пукаат од огнено оружје и солзавец кон демонстрантите, од кои некои возвраќаат со фрлање камења. Според Агенцијата за човекови права на САД (HRANA), протестите се прошириле во 111 градови и места во сите 31 иранска провинција.

Агенцијата вели дека најмалку 34 демонстранти и четворица припадници на безбедносните сили биле убиени во немирите, додека 2.200 лица биле уапсени. BBC Persian ги потврди идентитетите на 21 починато лице, додека иранските власти официјално ја објавуваат смртта на петмина припадници на безбедносните сили.

Протестите започнаа на 28 декември кога трговците во Техеран излегоа на улиците за да го изразат својот гнев поради драстичниот пад на вредноста на националната валута, ријалот, во однос на американскиот долар.

Вредноста на ријалот падна на рекордно ниско ниво во изминатата година, а инфлацијата достигна 40 проценти, како резултат на санкциите поради нуклеарната програма на Иран, како и лошото управување и корупцијата.

Студентите набрзо се придружија на протестите, а немирите се проширија и во други градови. Демонстрантите често извикуваа слогани против врховниот лидер, ајатолахот Али Хамнеи, а понекогаш изразуваа поддршка за Реза Пахлави, протераниот син на последниот шах на Иран.

Share on Facebook

Tweet

Follow us

Save