Се појави нов остров во Тихиот Океан, на него се пронајдени неочекувани организми

Кога во 2015 година се појави нов остров во јужниот дел на Тихиот Океан, геолозите, биолозите и еколозите добија единствена можност за истражување. Таквата ситуација е идеална за проучување на првите формации на екосистемите, односно увид во тоа како микробите колонизираат нови области.
Островот Hunga Tonga-Hunga Ha’apai (Хунга Тонга) немал многу долг век. Откако се појави во 2015 година поради вулканска ерупција, исчезна среде ист настан на почетокот на 2022 година. Но, во текот на седумгодишното постоење, островот откри неколку многу интересни тајни.

Во новото истражување, научниците објавија докази за неочекувана заедница на микроби на островот кои метаболизираат сулфур и атмосферски гасови, слични на организмите кои се појавуваат во многу различни живеалишта – термални извори на површината или во морските длабочини.

“Не го очекувавме тоа. Мислевме дека ќе најдеме организми кои ги наоѓаме при повлекување на глечерите или цијанобактерии, чест колонизатор. Наместо тоа, откривме уникатна група бактерии кои метаболизираат сулфур и атмосферски гасови“, вели екологот Ник Драгон од Универзитетот во Колорадо, а пренесува Science Alert.

Драгон и неговите колеги собрале 32 примероци почва од различни површини на островот, од оние во близина на морето до врвот на кратерот. Растителниот свет се појавил многу брзо на островот, веројатно благодарение на семињата во птичјиот измет, па научниците се концентрирале на собирање примероци од области без вегетација, а потоа извлекувале и секвенционирале ДНК од нив.

Тие пронашле бактерии и археи (протобактерии) во сите примероци од кратерот, иако овие микроби беа помалку разновидни од оние од блиските области со вегетација – но и многу специфични. Имено, би било логично првите микроби на новиот остров да потекнуваат од океанот или птичји измет, но изгледа дека тоа не било тука случај. Експертите претпоставуваат дека тие излегле од подземните длабочини.

Иако не е невообичаено островите одеднаш да се формираат во областа, тие обично не траат премногу долго. Во последните 150 години, Хунга Тонга е само трета таква копнена маса што се појавила и трае подолго од една година.
„Имаме вакви типови на вулкански ерупции низ целиот свет, но тие обично не создаваат острови. Имавме навистина единствена можност да истражуваме. Досега никој не ги проучувал микроорганизмите толку сеопфатно на овој тип островски систем“, вели екологистот.