Собрание: Пратениците работат, откажани се само пленарните седници и комисиите

По повод реакциите од јавноста дека пратениците се на одмор и сите активности се откажани, од Собранието се јавија со појаснување. Од таму велат дека пратениците доаѓаат на работа, но се откажани сите седници, комисии и други настани за кои е потребно присуство на медиумите.

„Во врска со реакциите за неодамнешната одлука за одложување на активностите на Собранието минатата и оваа недела, сакаме да појасниме дека Собранието на Северна Македонија и пратениците работеа и продолжуваат да работат. Откажани се пленарните седници, комисиите и неколку други настани за кои е потребно присуство на медиумите. Оваа одлука е донесена консензуално со сите координатори на пратеничките групи, на координативната средба, во знак на солидарност по трагедијата во Кочани и за изразување почит кон жртвите.

Сепак, работата на Собранието и пратениците продолжува во други вообичаени форми, вклучително и координација меѓу пратениците и пратеничките групи, ангажирање во подготовката и разгледувањето на предлог законите, како и состаноци на различни нивоа.

Пратениците се активни и посветени на законодавните процеси. Секоја изјава со која се претпоставува дека паузираат е неосновано обвинување кое претставува тенденција за манипулирање со мислењето и нарушување на угледот на Собранието и народните избраници.“, велат од Собрание.

Share on Facebook

Tweet

Follow us

Save