Со подводен електричен кабел во Црното Море, ЕУ ќе обезбедува струја за Западен Балкан?

Договорот меѓу владите на Азербејџан, Грузија, Романија и Унгарија за стратешко партнерство во областа на развојот на енергијата и транспортот ќе ги поврзе двата брега на Црното Море и би можел да транспортира електрична енергија во Молдавија, Западен Балкан и Украина, соопшти денеска во Букурешт, претседателката на Европската комисија, Урсула фон дер Баркинг.

Лидерите на Азербејџан, Грузија, Романија и Унгарија денеска во Букурешт потпишаа договор за транспорт на чиста енергија преку подводен електричен кабел во Црното Море од Азербејџан до Европа, пренесува Танјуг.

„Со оглед на актуелниот безбедносен контекст обележан со рускиот напад врз Украина, треба да воспоставиме подобра соработка и да покажеме поголема солидарност за да ги ублажиме заедничките проблеми“, рече романскиот претседател Клаус Јоханис на состанокот на кој присуствуваше и претседателката на Европската комисија Урсула фон дер Лајен.

Во таа прилика таа нагласи дека стратегијата на ЕУ е да се откаже од руските фосилни горива и да се сврти кон чисти извори на енергија со доверливи енергетски партнери.

„Европската унија успеа да компензира за намалувањето на рускиот гас. Но, не зборуваме само за управување со новата геополитичка ситуација. Станува збор за создавање иднина за нас во однос на чисти, достапни и безбедни извори на енергија, кои се облици на обновлива енергија“, рече претседателот на Европската комисија.

Фон дер Лајен истакна дека ЕУ е подготвена да обезбеди финансиска поддршка за тој проект откако ќе се направи физибилити студија. Претседателката на ЕК рече дека овој проект ќе ги поврзе двата брега на Црното Море и пошироко со регионот на Каспиското Море и дигитално и енергетски и дека електричниот кабел под Црното Море нуди повеќе можности.

„Овој проект може да донесе значителни придобивки за Грузија. Ова може да ја претвори земјата во центар за електрична енергија и да ја интегрира на пазарот на електрична енергија на ЕУ. Кабел под Црното Море би можел да пренесува струја до нашите соседи во Молдавија и Западен Балкан, а секако и до Украина. Ова ќе помогне во обновувањето на украинскиот енергетски систем и обновувањето на земјата“, нагласи Фон дер Лајен.

Договорот предвидува електричен кабел долг 1.100 километри со моќност од 1.000 MW кој поминува под Црното Море, од Азербејџан до Романија, како дел од напорите на ЕУ да ја замени енергијата што ја добиваше од Русија.

Share on Facebook

Tweet

Follow us

Save