Средба Трамп-Орбан денес во Белата куќа: Главна тема е руската нафта

Американскиот претседател Доналд Трамп ќе се сретне со унгарскиот премиер Виктор Орбан во Белата куќа за да разговараат за зависноста на Унгарија од руската нафта и можностите за зајакнување на економската соработка меѓу двете земји.

Ова ќе биде нивна прва билатерална средба откако Трамп се врати во Белата куќа во јануари, објави Ројтерс. Трамп инсистираше европските земји да престанат да купуваат руска нафта за да ги намалат приходите на Москва што ја финансираат нејзината војна во Украина, додека Унгарија не престана да се потпира на руската енергија од почетокот на конфликтот во 2022 година, предизвикувајќи критики од ЕУ и НАТО, велат експертите.

Пред состанокот, унгарските власти изјавија дека Орбан има намера да разговара за можноста за средба меѓу САД и Русија и да побара ослободување од енергетските санкции на САД. Трамп претходно најави можна средба со рускиот претседател Владимир Путин во Будимпешта, но таа беше одложена откако Русија го отфрли прекинот на огнот.

„Го познавам претседателот, тој ме познава мене, ние го знаеме проблемот, само треба да постигнеме договор“, изјави Орбан за државната новинска агенција МТИ, велејќи дека очекува пријателски разговори. Белата куќа соопшти дека лидерите ќе разговараат за области од „заемен интерес“ и наговестија за можноста за економски договори.

„Американскиот народ може да очекува повеќе добри договори во низа сектори од посетата на премиерот Орбан“, изјави функционер на Белата куќа.

Share on Facebook

Tweet

Follow us

Save