Сунак се пишмани, не планира да испрати британски војници во Украина

Британскиот премиер Риши Сунак изјави дека во моментов нема планови за испраќање британски воени инструктори во Украина, демантирајќи ја неодамнешната изјава на британскиот министер за одбрана.

Британија и нејзините сојузници досега избегнуваа формално воено присуство во Украина за да го намалат ризикот од директен воен конфликт со Русија.

Британскиот министер за одбрана Грант Шапс, назначен минатиот месец, во интервју за „Сандеј Телеграф“ изјави дека сака да испрати воени инструктори во Украина, покрај обуката на украинските војници во Велика Британија и другите западни земји.

Неколку часа по објавувањето на интервјуто, Сунак изјави дека во моментов не се планира испраќање британски војници во Украина.

„Министерот за одбрана рече дека еден ден во иднина можеби ќе биде можно да спроведеме дел од таа обука во Украина“, изјави Сунак за новинарите на почетокот на годишната конференција на владејачката Конзервативна партија во Манчестер.

„Но, тоа е нешто долгорочно, не овде и сега. Британските војници нема да бидат испратени да се борат во сегашниот конфликт“.

Поранешниот руски претседател Дмитриј Медведев денеска предупреди дека британските војници во Украина ќе бидат легитимна цел на руските војници.

Во последната година, Британија обезбеди петнеделна воена обука за околу 20.000 Украинци и има намера да обезбеди приближно ист број повеќе.

Шапс во интервју рече дека постои можност за воена обука во Украина по разговорите со британските воени команданти во петокот.

„Денеска зборував за фактот дека, во крајна линија, обуката треба да се приближи и да се спроведе и во Украина“, рече тој. „Особено во западниот дел на земјата, мислам дека сега има можност да се внесат повеќе работи „во земјата“, рече тој.

Шапс додаде дека се надева дека британските одбранбени компании како што е BAE Systems ќе ги спроведат плановите за отворање фабрики за оружје во Украина.

Share on Facebook

Tweet

Follow us

Save