Тачи: Мојот сон е сите Албанци да живеат во една држава

Претседателот на ДПА и дел од коалицијата „Европски фронт“, Мендух Тачи изјавил дека неговиот сон е сите Албанци да живеат во една држава, но дека тоа останува само сон, објави „Kosovo online“, пренесувајќи од „Albanian post“.

„Мојот животен сон е сите Албанци да живеат во една држава. Но, ова е во доменот на соништата. Ако ова стане дел од политичката реалност, последиците би можеле да бидат многу големи за нас како народ, а особено за Косово, која е нова држава и која е во важните моменти на заокружување на државноста“, изјавил Тачи во интервју за телевизијата „А“.

Како што наведува, оние кои погрешно ги толкуваат неговите изјави велат дека тој зборува против Косово, но тоа не е точно.

Тој посочува дека косовските „интервенции“ на македонските избори имаат последици само кон Косово.

Влијанието од мешањето на косовскиот премиер Албин Курти во македонските избори, поддржувајќи ја албанската опозиција, односно коалицијата „ВЛЕН“, како што вели, се потврди и со резултатите од првиот круг на изборите, на кои кандидатот на „Европски фронт“, Бујар Османи оствари голема разлика пред противкандидатот од албанскиот блок, Арбен Таравари.

„Победата е речиси два спрема еден“, истакнал тој.

Тачи додал дека како искусен политичар ја избира политичката рационалност наместо политичкиот романтизам.

„Можеби припаѓам на старата генерација политичари, но претпочитам политичка рационалност, мудрост во нашите постапки. Не храброст, застарен патриотизам, прекумерна романтизација и невидена преродба на некои поединци или групи“, рекол Тачи.

Share on Facebook

Tweet

Follow us

Save